Tura, Jun 19, 2025: Garo Hills-o manderangni nangnikenggipa, Additional Secretariat Complex-ko rikna gita a·dokni Skotong Minister Conrad K.Sangma, Bristibar salo pangchakani ro·ongko Tura Dakkopgre-o songe on·angaha. Ia pangchakani ro·ongko songe on·ani salo, Meghalaya Assembly-ni Speaker Thomas A Sangma, Deputy Speaker Timothy D Shira, Deputy Skotong Minister Sniawbhalang Dhar, Power Minister AT Mondal, Health Minister Ampareen Lyngdoh, PHE Minister Marcuise N Marak, Sports Minister Shakliar Warjri, Education Minister Rakkam A Sangma, Tourism Minister Paul Lyngdoh, Fisheries Minister AL Hek, Cooperation Minister Comingone Ymbon, MLA-rang, MDC-rang, official-rang aro dingtang dingtang dolrang dongpae bak ra·angtokaha.

Ia Additional Secretariat Complex-ko Tura-o rikna gita gong kror 156 tangkarangko sorkari chamataha. Additional Secretariat-ko Tura-o rikna pangchakani ro·ongko songe on·anichi a·dokna, mongsongbate A·chik a·songna chong·motan Garo Hills-ni manderangna gisik ra·beani sal ong·gen, ine Skotong Minister Conrad K.Sangma aganangaha.

Ia Additional Secretariat Complex-ko rikengon, manderangni nangnikaniko chu·sokatani ong·enga ine Skotong Minister aganaha. Sorkarini dingtang dingtang kamrangko ka·anio Garo Hills-ni manderang neng·nikanirangko chagrongengani gimin, ia Additional Secretariat-ko a·bachengatanichi a·dok sorkari, Garo Hills-ni manderangna nambate kamrangko dangdike on·na gita man·gnok ineba Sangma aganaha.

Shillong-o rikenggipa gong kror 1800-ni gital Secretariat building-ni bidingo talatangengon, mikkangni gimin chanchisoe, sorkari kamrangko ka·enga. Ia Secretariate Complex building-ko rikanichi sorkarini kamrangko manderangna sepangbatanisan ong·aigija, kamrangko altubatatgnok ine Skotong Minister aganangaha.

Skotong Minister-ni aganangani gitade, Garo Hills-o rama jal·langrang namjani gimin, pilakni gitan namroro silroroani dongsrangjani gimin bang·a manderangan suk ong·gijaniko parakatengon, MDA sorkari, Meghalaya a·dokko nambatsranggipa a·dokrangoni damsa ong·atna niksamsoani gnang kamrangko ka·enga, ineba Sangma parakangaha.

MDA sorkari, a·dokni pilak district aro block-rangon, gital office-rangko rikna tangka paisarangko chamataha aro da·alo block office, pulis station pilakon dingtanganiko nikna man·engaha ine Skotong Minister aganaha.

Da·o Jowai aro Pynursla-o rikenggipa Mini Secretariat-ni giminba Skotong Minister, jinmana talatangaha.

Ia Additional Secretariat Complex-o block ge·gittam donggen aro skanggipa phase Skotong Minister-ni Complex-kode, 2027 bilsini January jao matchotate, Meghalaya Day-ko January 21 tariko maniani salo oprake on·na gita nisan donenga ine Sangma aganangaha.

Sorkarini niksamsoe kamrango ka·anio pilakan bakrimaniko on·engani gimin, Skotong Minister, unbaksa ka·rimska Cabinet Minister-rangko aro dingtang dingtang political dolrangko mittele aganangaha.

Unbaksana, Tura-ni ramarang apchangket ong·aniko komiatna a·dok sorkari gong kror 900 tangkarangko Tura By-pass-ko tarina chamataha ine Skotong Minister parakataha.

Tura-o rikna sienggipa Additional Secretariat building-o Skotong Minister, Cabinet Minister-rang, Chief Secretary, Additional Chief Secretary aro dingtang dingtang dal·dalgipa Officer-rangnaba kuturirang donggen. Ia Complex-o dingtang dingtang sorkari department-rangnaba biap donggen, ine Sangma parakangaha aro ian gamchatgipa Additional Secretary building ong·gen, ine Sangma parakangaha.