Ampati, July 11,2025: South West Garo Hills a·jao ma·mong sorkarini scheme-rangko nambate chu·sokatna gita Butbar salo, Tura-ni MP Saleng A Sangma, District Development Coordination & Monitoring Committee-ni tom·aniko Ampati DRDA Conference Hall-o ong·atangenba, dingtang dingtang department-ni kamrangko nipilangaha.
Ua tom·anio Tura-ni MP aro DISHA-ni Chairman Saleng A Sangma baksana DISHA-ni membor-rang, chong·motan, UG Sangma, Simberth Ch Marak, Learmilford A Sangma, Manseng D Sangma aro gipinrangba dongpae bak ra·angaha.
Indake tom·anio, South West Garo Hills a·jani Deputy Commissioner Hema Nayak, DRDA-ni Project Director RZD Shira, District Administration-ni gipin official-rang aro dingtang dingtang department-ni official-rangba dongpae bak ra·angaha.
Ua tom·anio dingtang dingtang department-ni officer-rang department-tangtangni ning·o, ra·gate ka·enggipa aro chu·sokgimin kamrangko Tura-ni MP-na agan-talate on·angtokaha. Chu·sokanirang baksana kamrangko ka·anio chagrongenggipa neng·nikani aro mikkangchi dakna miksonganirangko official-rang, Tura-ni MP-na talatangaha.
Uandake dingtang dingtang department-rangni neng·nikanirangko Ministry-rangna u·iatskana ku·rachakangenba, sorkarini scheme-rangko, a·songo songdonggipa manderang sakantinan sokatna gita ua scheme-rangni gimin manderangna u·iataniara scheme-ko jako ra·e ka·enggipa department aro officer-rangni daito ong·a ine Tura-ni MP aganaha.
Ua tom·anio, sanna banani kamrang, jekai an·o donggipa me·chikrang aro bi·sarangna nirok simsakani, an·chi komigipa me·chikrangna simsak nirokani aro samrangko sokate on·ani bidingo chanchirimangenna, Ampati Civil Hospital-o nanganirangkoba Sangma sing·e ra·angjolaha.
Una agreba, South West Garo Hills a·jani dingtang dingtang department-rang jekai Power, ICDS, Agriculture, Fishery aro uandakgipa department-rangni giminba tom·anio Tura-ni MP chanchidilangaha.
