Tura, June 9,2025: Tura songjinmao donggipa dingtang dingtang gittimrang, jekai Araimile, Dermile, Hawakhana aro gipin gittimrangko gipin ku·sikrangchi minganiara A·chik jat aro a·songna nitogijani ong·an baksana ku·tangchi biming minganiko dal·e ra·ja gita ong·enga ine A·chik Youth Welfare Organisation (AYWO) parakatenba, ia gittimrangko A·chik bimingrangchi mingsrechina dabiangaha.

AYWO-ni General Secretary Changkey R Marak-ni parakatani gitade, Tura-ni Araimile gittimko Goanang Baptist Mondolini bimingo pangchaken Goanang ine mingaha, indiba bang·bata manderangan ia bimingni pal da·onan Araimile inesa jakkaltokkuenga aro ian ia gittimnasan ong·aigija A·chik jat aro a·song gimiknan nitogijani ong·enga.

“Apsan daken Hawakhana-koba skangonin Balnangkol A·chura inesa mingachim, indiba da·alonan ia gittimkoba Hawakhana ine gipin ku·sikchisa manderang jakkaltokenga. Una agreba, manderangni Dermile minggipa biapkoba ia biap gita jokenggipa Rong·ka Chiringni bimingchisa Rong·ka A·ding ine skangonin mingahaoba da·alonan manderang, ia gittimkoba A·chik bimingchi minggija gipin ku·sikchisa mingtokkuenga,” ine AYWO-CEB, Tura-oni parakataha.

Tura-o Supari Colony, Mahindra Colony aro uandakgipa gipin gittimrangko gipin jatni ku·sikrangchi biming donanirang batroroengani gimin AYWO suk ong·gijaniko parakatenba, iandakgipa gittimrangko sandie, A·chik bimingrangchi mingsrechina AYWO-ni General Secretary, West Garo Hills a·jani Deputy Commissioner-ko didiataha.

Khasi Hills-o jekdake, Lady Hydari Park-ko Ka Phan Nonglait Park aro Cherrapunji-ko Sorah mingaha apsan daken Garo Hills-oba, mongsongbate Tura songjinmao, gipin ku·sikrangchi biming dongipa gittimrangko A·chik bimingrangchi mingchina gita AYWO, a·dok sorkarikoba didiataha.