Tura, Oct 29,2024:Tura NEHU Campus-ni A·chik chatro chatrirang, ia bilsio gital poraina re·bagipa chatro chatrirangko rimchaksoani program ba Freshers’ Meet-ko October 26 tarik Sonibar salo Tura District Auditorium-o ong·atangaha ine koborna u·iataha.

Ia program-ona Tura-ni MDC Bernard N.Marak mongsonggipa sokgipa ong·e, chatro chatrirangna nambee agan ku·pattianirangko on·angaha aro poraienggipa chatro chatrirangna ka·dongatani kattarangko aganangaha. Unbaksana Garoland State Movement Committee (GSMC) CEC Headquarter-ni Acting Chairman Balkarin Ch.Marak-ba program-o dongpae namgipa ku·pattianiko on·angaha.

Uandake, uamangni program-o dongpae bak ra·anichi namen mikkim gnangataha. Ia program-ko ong·atani miksongara, A·chik chatro chatrirang apsan ku·monge, mikkangchi ja·kusan ga·na aro A·chik charo chatrirangni namgnina re·mikkange kamrangko ka·angna ku·mongani ong·a.