Tura, June 3, 2025: Tura-ko Winter Capital songchina dabiengani bidingo A·chik Conscious Holistically Integrated Krima (ACHIK) Organisation-ni dilgiparang, Sombar salo a·dokni Governor CH Vijaya Shankar-ko Shillong songjinmao gronge, A·chik jatni dingtang dingtang nangchongmotgipa kamrangni gimin segipa chittiko uni jako on·an baksa agangrikeaha.

ACHIK Organisation-ni mongsonggipa dabianirangara skanggipa Tura-ko Winter Capital songe on·china dabiani, gnigipa Bangladesh a·songni manderang Garo Hills-ona niamgri napsrukbae songdonggiparangko champengsoani, gittamgipa Garo Customary Law (GCL)-ko ta·rake soi ka·china didiani, brigipa Captain Williamson Sangma State University-na chu·onga gita tanga paisarangko chamatchina mol·molani, bongagipa
Baljek Airport-ko ta·rake kulie on·china didiani aro dokgipa Dadenggre Civil Sub-Division-ko District-ona ra·doate on·china dabie segimin memorandum-ko Governor-na on·angaha.

Ia dabianirangko ning·tue poraienba je nangarangko niroke kam ka·atgen ine Governor ka·dongatani kattarangko ACHIK Orgaisation-ni dilgiparangna parakataha ine ACHIK Organisation-ni General Secretary Adam R.Sangma u·iataha.

Indiba, Garo Customary Law-ni gimin agangrikon, uni jakona Garo Customary Law-ni lekkarang sokbakuja ine aganchakaha. Iarangni gimin, ACHIK Organisation ning·tue sandianirangko dakenba kamrangko ka·anggen, ine Sangma parakataha.

Garo Hills-ara Shillong songjimaoni namen chel·grikani gimin, Tura-oba Secretariat office-ko songe sorkarini kamrangko suale, ka·anichi Garo Hills-o dingtanganiko ra·bana man·gen, ine ACHIK organisation-ni dilgipa aganaha.

Tura-ko Winter Capital songanichi, sorkarini kamrangko Tura-ona ra·bae ka·ode, Garo Hills-o songdongenggipa manderangba nengrae dakchakanirangko man·gen aro dingtang dingtang namroro silroroani kamrangko ra·baan baksa bang·a namgnirangko man·gen, ine Sangma parakataha.

Tura-ko Winter Capital songchina dabianiko a·dokni Governor nirokatna ku·rachakataha ineba ACHIK organisation-ni dilgipa parakataha.