Agartala, May 30, 2025: Tripura a·dokni Gandacherra Sub Division-ni Dumbur Nagar RD Block-ni ning·o donggipa Nakucherra ADC minggipa songo bilsi 15 ong·gipa me·chik bi·sako bilsi 39 ong·gipa me·apa saksa May 27 tariko kragija til·ekdraaha.
Pulisni kobor on·ani gitade, dos dakgipa mandeko Purna Dayal Chakma mingachim.
Chadra Kumar Chakma-ni demechik Prabhu Ram Para-o donggipa an·tangni noko saksan dongengmitting somoio ua a·sel pring seng·nachibara 2 bajimano ong·aha. Ua me·chik bi·sani ma·gipa pagipa rubber baganchi kam ka·na re·angenba, ua walo uamang nokona re·bapiljaha. Indakmitting somoio Kina Mohan Para-o donggipa bia ka·gimin Purna Dayal Chakma nokko dokprue napenba, me·chik bi·sani mikkangko ba·ra pindape kragija kal·akaha.
“Dos dakgipa mande nokona napdraangenba, me·chik bi·sako kragija kal·akaha” ine Gandacherra Pulis Station-ni senior official aganaha. “Ia mamla namen mongsonggipa ong·ani gimin chinga raken kamko ka·enga aro dos dakgipa mandeko rim·na sandienga” ine official NET-ni kobor ra·timgiparangna aganaha.
Duko ga·akgipa me·chik bi·sa, jensalo ma·gipa pagipa nokona sokbaaha, ua a·sel ong·aniko ma·gipana tale aganaha. Indake ua a·selni bidingo me·chik bi·sani pagipa Chandra Kumar Chakma, May 28 tariko Gandacherra Pulis Station-o badi ka·aha. Badi ka·ani ja·mano bil gnanggipa authority-rang a·sel ong·gipa biapona re·ange sandina a·bachengaha aro Gandacherra Sub Divisional Hospital-ona me·chik bi·sako porikka ra·e nina gita watataha. Uandake, Unakoti a·jao donggipa Kailashahar-ni forensic team-ko okamate, duko ga·akgipa me·chik bi·sani bidingo sandianiko dakchina pakwataha.
“Da·o porikka ra·e nianiko dakenga aro chong·motgipa sakkiko man·na chinga ka·dongenga, ia medical report-o pangchake, sandianiko dakgen” ine official agandapataha.
Dos dakgipa mandeni kosako, Protection of Children from Sexual Offences (POCSO) Act, 2012-ni section 6-ni ning·o pangchake mamlako segataha.
Da·dipet, Purna Dayal Chakma nokoni kate dongnuenga, indiba pulisrang uko rim·na sandianio man·na ka·dongenga, ine parakatenba, “Chinga man·adipet je cholchiba ta·raken, dos dakgipa mandeko rim·na sandienga” ine official aganaha.
