Tura, July 1, 2025: Raksamgre Civil Sub Division-ni ning·o donggipa Rengegre songo Pirot R Marak-ko uni jikgipa Nennen Rangsa aro uni mikchagipa Reknan K.Sangma, Lepson Rangsa aro Sengba Rangsa kal·ake so·otani mamlao kam ka·anirang ka·sina ine matnangenba, sianggipa ma·drangni namgnina Tikrikilla Pulis Station-ni officer-in-charge-ko dingtang biapona kam ra·jitangchina, Tikrikilla jolni dingtang dingtang NGO-rang jekai GSMC, ADIL, FAF aro Save-B Mahal, GSU West Garo Hills a·jani Superintendent of Pulis (SP)-ko didiataha.

“Rengegre songo Pirot Marak-ko uni jikgipa Nennen Rangsa uni mikchagipa Reknan K Sangma aro Nennen-ni adagipa Lepson Rangsa aro jonggipa Sengba Rangsa, April 14 tariko so·otaha ine matnangenba, Pirot-ni ma·drangrang, May 7 tariko badi ka·ahani gimin, June 12 tariko uni manggisiko bilpilani ja·mansa ma·sina man·aha” ine NGO-rang parakatenba, sianggipa mandeni ma·drangrang ia a·selni bidingo May 7 tarikon badi ka·ahachim, indiba jasani ja·man June 12 tarikosa uni manggisiko bilpilaniara pulis officer-ni kam ka·na gisiko nanggijaniko mesokani ong·aha ine NGO-rang matnangataha.

“Pirot Marak-ni manggisiko bilpilna gita jasa somoiko ra·aniara ma·drangni pulisrango ka·dongna man·gijaniko mesokaha. Ian manderangni pulisrango bebe ra·na man·gijani ong·a. Uni gimin sianggipa mandeni nokdangna kakket bichalko on·anio namen ja·manchakenga,” ine NGO-rang parakataha.