Resubelpara, Nov 26, 2024: North Garo Hills aro Assam-Goalpara a·jani Kongkhal sima ari aro Bajengdoba Birubari sepang jolo donggipa Chorebolbok songni VEC Secretary Jewilson Sangma aro Sorder Laston Momin, Job Card-ni tangkana mikboke tangenggipa mandeko siaha ine tol·drae, Death Certificate tarienba tangka oke cha·aha aro siaha tol·ako man·gipa Rilipson Marak-ni jikgipa Jenny K.Sangma kobor ra·timgiparangna aganaha.

Indake tangkuenggipa mandeko tol·e Death Certificate tarie tangka oke cha·aniara namen kragijani kam ong·a, ine Chorebolbok songni VEC Secretary aro Sorder-ni kosako South Garo Hills a·jani Social Activist Greneth M Sangma, North Garo Hills a·jani Deputy Commissioner-na badi ka·doangaha.

VEC Secretary aro Sorder nangrime, Job Card-ni tangkako togie okna ine tangenggipa mandeni bimingo Death Certificate tariahani gimin jegalate, Chorebolbok songni VEC Secretary Jewilson Sangma aro Sorder Laston Momin-ni kosako, Social Activist Greneth Sangma, Sombar salo North Garo Hills-ni Deputy Commissioner-na badi ka·aha aro dos dakgipa manderangko ta·rake rim·enba raka sasti on·china, North Garo Hills a·jani SP aro Resubelpara C&RD Block-ni BDO-ko didiataha.

Greneth Sangmani seatgipa chittio janapatani gitade, dosi dakgipa VEC Secretary aro Sorder, jeni bimingon Death Certificate-ko tol·e tariahachim, uan Rilipson Marak ong·a, da·o ua Chennai-o kam ka·enga.

Ia kamara VEC Secretary aro Sorder-ni dal·bea gualani ong·a, tangenggipa mandeko siaha ine Death Certificate tarianiara ramram katta ong·jaha aro dos dakgipa manderang raka sastiko man·na krachongmota. Uni gimin, bil gnanggipa authority-rang dos dakgipa manderangko ta·rake rim·na nanga aro tangenggipa Rilipson Marak-na kakket bichalko ba raiko on·na nanga ine Greneth Sangma dabiangaha.