Ampati, Oct 26, 2024: South West Garo Hills a·jani Mahendraganj Baksalpara songo rikenggipa Science aro Commerce College aro Ampati Kebolpara songo Engineering College-ko rikenggipa da·onaba matchotkujaengani gimin Niksamso Garo Community Organisation (NGCO) jegalatenba, iani bidingo ta·raken sandianiko dakchina a·dokni Skotong Minister aro Education Minister-o dabiangaha.

NGCO-ni parakatani gitade, Mahendraganj-o rikenggipa Science & Commerce College-na NLCPR-ni ning·o gong kror 36.31-ko aro Ampati-o rikenggipa Engineering College-na NLCPR-ni ning·on gong kror 41 tangkarangko on·ahachim, indiba ia college-rangko rika matchotgija adita bilsirangna galchipe donenga.

“Chingni am·sandie man·ani gitade, ia college ge·gnina NLCPR-ni ning·o krorni kror tangkarangko sorkari chamataha, indiba ia college-rangko rikenggipa contractor-rang da·alonaba matchotate on·kujaengani gimin chinga namen duk ong·a. Indake chatro chatrirangni namgnina on·atgipa tangka paisarangko rusie galenga” ine NGCO-ni dilgiparang parakatenba, ia college ge·gniko rika bilsi 8 ong·pilahaoba maini a·sel da·onaba matchotkujaenga ine a·dok sorkario sing·doataha.

Indakgipa kamrangko a·dok sorkari nirok sandianirang dongjani a·selsa ia project-rangko jako ra·e kam ka·enggipa contractor-rang, kamrangko somoi gita matchotatchipjaenga aro tangka paisarangko jakkalsretenga, ineba NGCO matnangataha.

Uni gimin, iani bidingo sorkari ta·rake sandianiko dakja ong·ode, an·tangtangan am·sandianirangko dakenba, kachariona ra·anggen ine NGCO mikrakataniko on·ataha.