Ampati, May 24,2025: South West Garo Hills a·jani Deputy Commissioner Hema Nayak, Zikzak C&RD Block-ni Block Development Officer Digonto Hajong baksa Sukrobar salo Mahendraganj jolni wilwilao donggipa dingtang dingtang Project-rangko niangaha.
Ua project-rangara Health, Education aro dingtang dingtang department-ni ning·o ka·enggipa project-rang ong·a aro a·jani manderangna sorkarini ra·gate on·gipa kamrangko name chu·sokatna gita SWGH a·jani Deputy Commissioner, ua kamrangko niangaha.
Ua kanggipao, Mahendraganj Community Health Centre (CHC)-ona re·ange, Hospital-ni Senior Medical & Health Officer, Dr. Noor Ain Khan baksa Health Centre-ni bidingo chanchirimaha aro sorkarini dingtang dingtang health program-rang, jekai Non-Communicable Disease, Megha Health Insurance Scheme (MHIS) aro uandakgipa dingtang dingtang Scheme-rangni kamrangko sing·sandie ra·angjolaha.
Mahendraganj-o rikenggipa Science & Commerce College-koba, Deputy Commissioner niangaha aro ua College-ni Academic Session-ko re·baenggipa August jaoni a·bachengna man·na gita kamrangko somoi gita matchotatchina didiangaha.
District Water & Sanitation Mission-ni Chairperson-ba ua salo Deputy Commissioner, Hema Nayak, Silkona Combined Water Supply Scheme-koba niangaha aro ua Water Supply Scheme-ko nieanio DC baksana Zikzak-ni BDO, PHE Ampati Division-ni Executive Engineer, PHE Ampati Sub-Division-ni SDO aro gipin official-rangba dongpaaha.
Ua scheme-ni ning·o dam 11 songrang aro te 1880 nokdangrang namgnirangko man·na ka·dongenga, ine PHE official-rang DC-na parakataha.
Bon·kame, ua Zikzak-ni Kasturba Gandhi Balika Vidyalaya-koba niangaha aro ua skulo poraienggipa bi·sarang aro skigiparang baksa agangrikangjolaha.
