Ampati, Oct 23, 2024: A·chik Holistic Awakening Movement (AHAM) South Western Zone Ampati, Mahendraganj Baksalpara-o rikenggipa Commerce aro Science College baksana Ampati Kebolpara-o rikenggipa Engineering College ge·gniko rika matchotchipjaengani gimin, ua college-rangko ta·rake matchotatchina a·dokni Skotong Minister-ko didiataha.

AHAM South Western Zone-ni President Wester G.Sangma-ni parakatani gitade, ua ge·gni college-rangko a·dokni gitcham Skotong Minister Dr.Mukul Sangma, 2017 bilsini November 22 tariko pangchakani ro·ongko songe on·ahachim. Indiba ua college-rangko da·onaba rika matchotchipkujaengani gimin, South West Garo Hills a·jani manderangna, mongsongbate poraienggipa chatro chatrirangna dal·bea gimaani ong·engaha ine AHAM South Western Zone-ni President parakataha.

Ua college-rangara, South West Garo Hills a·jani chatro chatrirang jemangan Commerce, Science aro Engineer-na poraiengiparangna namgipa cholko on·ani ong·achim. Uni gimin ua college-rangko ta·rake matchotatchina AHAM South Western Zone, a·dokni Skotong Minister-ko mol·molataha.

“Ia Commerce, Science aro Engineering College-ara, South West Garo Hills a·jao mongsonggipa skie ra·ani nambegipa chol ong·achim. Indiba ia college-rangko jadok batpile kamrangko ka·gija dontongaha” ine AHAM South Western Zone-ni President suk ong·gijaniko parakataha.