Shillong, April 20,2025: Sorkarini dingtang dingtang scheme-rangko ra·na gita Aadhar-ko link ka·na nangchongmotengani gimin Budbar salo, Awakening India Movement (AIM) Meghalaya Unit, Shillong Civil Hospital sambao donggipa U Kiang Nangbah-ni Statue sepango jinma jegale re·jomaniko ong·atangaha.

Tom·anio AIM Meghalaya Unit-ni Chairman Banshai Marbaniang, jinmana aganprakengon, mandena on·gimin bilo pangchake, manderangni namgnina sorkarini ra·gatgipa scheme-rangko ra·na maming dakeba Aadhar card-ko nangchongmotgipa ong·atna man·ja ine parakataha.

Meghalaya a·dokni bang·a biaprangon, manderangko Aadhar link ka·china draengani gimin, manderang, sorkarini on·enggipa cha·ani bosturang aro dingtang dingtang nanganirangko man·tokjaenga ineba ua aganaha.

Uamangni ia jinma tom·e re·jomaniko ong·ataniara Aadhar-ni kosakosan jegalenga ong·ja indiba manderang an·tangtangan Aadhar-na biming segatgenma segatajawa uko basena bil donganiko jinmana u·iatna miksongesa ong·ataha ineba Marbaniang aganaha.

Aadhar Card-rang dongjani a·sel bang·a chatro chatrirangan, an·tangtangni man·na nangenggipa scholarship-rangko man·tokjaengani giminba AIM-ni dilgipa suk ong·gijaniko parakataha.

Ua biapo tom·dakani ja·man, AIM-ni member-rang Secretariat-ona jinma re·jomange Skotong Minister Conrad K Sangma-na Memorandum-ko on·na gita jotton ka·ahachim, indiba pulisrang uamangko champengsoskaaha.

Indiba Skotong Minister dongjani gimin AIM-ni dilgiparang, East Khasi Hills a·jani Deputy Commissioner RM Kurbah-ni jako Memorandum-ko on·angskaaha ine koborna u·iataha.