Resubelpara, June 11, 2025: May 22 tariko Madhya Pradesh a·dokoni re·bagipa tourist saksako uni jikgipa aro gipin sakgittam manderangni so·ote galangani bidingo gipin biaprangoni re·baenggipa manderangko nambate nirikkina man·na gita a·doko Inner Line Permit (ILP)-ko ra·gatchina dingtang dingtang dolrang a·dok sorkario dabiengani ja·man, Garo Enlightenment Society (GES) dolba, ILP-ni bidingo ma·mong sorkari baksa agangriktaichina didiate, a·dokni Skotong Minister Pa Conrad K Sangma-na sedoataha.
“Meghalaya a·doko ILP-ko ra·gatchina dabianiara ru·uta bilsirangonin dabibaenga aro ian salgro salaram a·dokrango songdongenggipa Tribal manderangko chel·chakna a·songni niam bidiko pangchake dabiani ong·enga,” ine GES-ni dilgiparang, Skotong Minister-na sedoatgipa chittio janapataha.
Adita salrangna skang Sohra jolo ong·anggipa a·selni gimin janapatengon, ia a·selna badiaba National Media-rang aro mitam manderang, Meghalaya a·dokko aro Salgro Salaram jol gimikko man·gope ong·gija matnangna jotton ka·aha, indiba ja·mano ua mandeko, uni jikgipasa a·doktangni manderangko rimbae so·otataha, ine ma·sina man·aha ine GES-ni President Clinctone Marak parakataha.
“Ua a·sel ong·anio pangchake, Meghalaya a·doko ILP-ko ra·gatna gita ma·mong sorkariko didina namgipa somoi aro chol ong·enga ine chinga bebe ra·a. Uni gimin a·doko ILP-ko ra·gatchina dabiengani bidingo a·dok sorkari ma·mong sorkari baksa agangrikdilgenchimode, chinga pilakan mittelbegen,” ine GES, Skotong Minister-na seatgipa chittio janapataha.
Meghalaya a·doko ILP-ko ra·gatchina dingtang dingtang NGO-rangni dabianio a·doko songdongenggipa pilak manderangkon aro a·dok sorkarikoba bakrimchina GES didiataha.
