Tura, Nov 16,2024:East aro West Garo Hills a·jani Silsorchigre songo donggipa “Sonja Wildlife Rescue Centre”-ni hurorangko Ri Bhoi a·jao donggipa gital “Umtrew Zoo”-ona ra·jitangna miksonganiko, A·chik Holistic Awakening Movement (AHAM) HQ Tura jegalatenba, a·dokni Skotong Minister Conrad K Sangma-na sedoattaiaha.

Koborni gitade, November 14 tariko Shillong Secretariat-o iani bidingo tom·aniko ong·atangtaiaha aro ua tom·aniona, Sonja Wildlife Rescue Centre-ni officer in-charge-koba okamatahachim.

Sonja Wildlife Rescue Centre-o donenggipa huro-rangko gipin biapchi ra·jitangna miksongenganiko jegalatenba, Skotong Minister-na sedoatenngon, badiaba manderangni man·gnina, Garo Hills-ni huro-rangko ra·draanganisan ong·enga, indiba Garo Hills-ni huro-rangko maming dakeba gipin biapchi ra·jitangna on·jawa, ne AHAM HQ-ni President George Prince Momin parakataha.

Meghalaya a·doko gital kuligipa Umtrew Zoo-o matburingrangko gapatna nangengani giminsa, ‘Sonja Wildlife Rescue Centre’-o donenggipa huro-rangko ra·angna miksongenga. “Chinga Garo Hills-ni matburingrangko gipin biapchi ra·angna on·jawa, Garo Hills-ni matburingrang Garo Hills-on dongchina. Ia huro-rangko sin·gipa biapona ra·angode, janggi tangna man·jawa, cha·a ringanirang biapni kri dingtanggen aro janggi tangana man·jawa” ine Momin parakataha.

Batanggipa adita jarangna skangsan, Sonja Wildlife Rescue Centre-ni Huro-rangko gipin biapchi ra·jitangna am·ani bidingo, so·sojengjeng ong·e, Garo Hills-ni dingtang dingtang NGO-rang, Social Organisation-rang jegalaniko dakenba, Skotong Minister-na sedoattokaha. Uni gisepon, Skotong Minister an·tangan Garo Hills-ni Huro-rangko gipin biapchi ra·jitangna miksongani dongja ine aganchakaha. Indiba re·anggipa November 14 tariko Sonja Wildlife Rescue Centre-ni Huro-rangko ra·angna meeting ka·taianiara ra·chakna man·gijani ong·a ine AHAM-ni President parakataha.

“Miksonganide, Umtrew Zoo-ona gipin a·dokni Giraffe aro gipin matburingrangko ra·baenba, Sonja Wildlife Rescue Centre-ni Huro-rangko ra·angskae bodolna jotton ka·enga. Badiaba manderang an·tangtangni man·gnina chanchie dakanisan ong·aia, indiba chinga Garo Hills-ni Huro-rangko ra·angna on·jawa” ine Skotong Minister-na sedoatgipa chittio AHAM-ni President parakataha.