Tura, June 23, 2025: A·chik a·songni dingtang dingtang songadamrango lekka poraniko tang·doatna gita, Tura-ni Mothers’ Union (MU), Community Onward Movement for Education (COME) Project-ko Sonibar salo, Tura Mission Compound-o donggipa Working Womens’ Hostel-o a·bachengataha.
Ia tom·aniko Tura Don Bosco College-ni Principal Rev. Fr. Januarius S. Sangma-ni ku·rangchi Isol bi·e a·bachengataha aro Isolo bi·ani ja·man, ua jinmana aganprakangengon, lekka poraniko namdapatna gita iandakgipa ja·kurangko de·engani gimin Mothers’ Union-ko mittele aganangaha.
Tom·anio, Mothers’ Union-ni President Ma Sume Chandola B, Sangma, rimchaksoani kattarangko agane, ia Project COME-ni bidingo talate on·angengon, A·chik a·songni songadam nokadamrango skulrangko chalaianio neng·nikanirangko warachakna ja·ku de·e re·chakatani project ong·a ine ua aganangaha.
Ia Project-ara skulrangko biming mangmangchi deragataigija, pilakni gitan namroro silroroaniko ra·bana jakkandile re·mikkangani ong·enga ineba Ma Sangma aganaha.
Ia program-ko ong·atanio, Learning Sanctuary-ni nokgipa aro Headmaster Pa Tyrone D’ Brass-ba dongpae jinmana aganprakengon, lekka poraniko tang·doatna gita ka·dongbee sorkari baksa jak on·ahanina Mothers’ Union-ko mittelangaha aro lekka porani kamrango pilakan bakrimchina didiangaha.
Indake, ia tom·anio Captain Williamson Sangma State University-ni Vice Chancellor Dr. Vasanthi Vijaykumar-ba dongpae jinmana aganprakangengon, University-ni dingtang dingtang program-rangchi ia project-na dakchakanirangko aro bakrimaniko on·na ku·rachakenba, chol ong·gijagipa skulrangko tang·doatanio pilak Institute-rangkon bakrimchina didiangaha.
Unbaksana ia tom·anio gitcham Education Commissioner Ma Lutherine R Sangma-ba dongpae aganprakangengon, sorkari skulrango chagrongenggipa neng·nikanirangko janapangenba, ia Project COME-ara, iandakgipa skulrangna bang·en dakchakani ong·gen ine an·tangni ka·dongchakaniko parakangaha.
Ia Project COME-ko a·bachengatanio bak ra·anggipa gipin manderangara State Early Childhood Care & Education Program-ni Coordinator Ma Singje Ch Marak aro gipinrang dongpaaha.
