Shillong, 12, 2025: Indore-oni songrebagipa tourist, Raja Raghuvanshi-ko so·ote galna chanchidilgipa Sonam aro uni ‘mikchatang’ Raj Kushwaha, Vishal Singh Chauhan, Akash Rajput aro Anand Kurmi-ko Meghalaya pulis Monggolbar walo, Indore-oniko Shillong-ona rimbaaha aro pilak nanga kamrangko matchotani ja·man, Budbar salo kachariona rimangaha.

Pulisrangni aganani gitade, ia sakbonga manderangan an·tangtangni dosko ku·rachakaha, indiba uamangni ku·rachakaniko kachario ra·chakna man·na gita uamang Magistrate-ni mikkango ku·rachakna nangenga.

Ia sakbonga manderangko da·o sal 8-na pulisni ning·o donchina katchari rai on·atahani gimin, pulisrang, ia manderangko sing·sandina a·bachengataha.

Re·anggipa May-ni 23 tariko Raja Raghuvanshi-ko so·otanio dos dakgipa manderangni bidingo janapatengon, ia manderango sing·sandiani aro uamangni parakaniko see rakkiani ja·man, dos dakgipa sakbonga manderangko uamangni Raja-ko so·otgipa biapona rimanggen, ine East Khasi Hills a·jani SP Vivek Syiem parakataha.

SP-ni aganani gitade, sakbonga manderangko Budbar salo Shillong-ona rimbaani ja·man, Sonam-ko an·o dongama dongja, uko Ganesh Das Hospital-o porikka ra·e niaha aro ua an·o dongja, ine ma·sina man·aha. Indiba June 24 tarikni ja·man, Sonam-ko porikka ra·e nitaigen ineba Syiem aganaha.

Indake, Raja-ko so·otanio jak donggipa gipin sakbri manderangkoba Budbar salo, Sadar Pulis Station-o doctor-chi porikka ra·e niaha ine SP parakataha.

Da·o dipet dos dakgipa sakbonga manderangkosan rim·engkua, indiba am·sandianiko dakanio gipinrangba jak donga ine nikgenchimode, gipin manderangkoba rim·kugen ineba ua aganaha.