Shillong, June 9, 2025: Madhya Pradesh a·dok Indore-oni May 22 tariko Meghalaya-ona songrebagipa tourist jiksesa, Raja Raghuvanshi aro uni jikgipa Sonam Raghuvanshi re·anggipa May 23 tarikoni Sorah jolo gimaani sal 11 ja·man,June 2 tariko Raja-ni sogimin manggisiko Weisawdong chidare sambao donggipa chubegipa a·silangoniko man·aha.

Indiba uni jikgipa Sonam Raghuvanshi-kode man·jaha, uandake Raja Raghuvanshi-ni siani chong·mot a·selko ma·sina Special Investigation Team (SIT)-chi sandianiko a·bachengataha. Indake Raja-ni manggisiko man·ani antisa ja·man, chong·motan June 8 tarik walo Sonam Raghuvanshi, Uttar Pradesh a·dokni Gazipur a·jani Nandganj Pulis Station-o an·tangko bame pakwate on·eaha, ine a·dokni DGP, I.Nongrang parakataha.

Sonam mai miksonganio segipako so·otna gita
manderangko hired ra·ahachim, sandianiko dakenga. Da·o dipet segipako so·otanio jak donggipa sakgittamko rim·aha, uarangoni saksade Uttar Pradesh-oni aro gipin sakgnide Madhya Pradesh-oni ong·a ine Nongrang aganaha.

Da·o dipet Raja-ko so·otgipa sakgittamko rim·aha aro gipin saksako rim·na sandiengkua, ineba DGP parakataha.

“Salsnini gisepon, Raja Raghuvanshi-ko so·otani bidingo Meghalaya Pulis sandianio chu·sokaha. Madhya Pradesh-oni sakgittam manderangko rim·aha, me·chikde an·tangan bame on·eaha aro da·o saksako rim·na sandikuenga…Nambejok Meghalaya Pulis” ine Skotong Minister Conrad K Sangma Social Mediao parakataha.