Tura, Aug 30,2024: West Garo Hills, a·jani Dadenggre Civil Sub Division-ko gital district songchina ru·utbea bilsirangoni dabitokengon, da·ona kingkingba MDA sorkari Dadenggre-ko gital district songe on·kuja. Indiba East Khasi Hills a·jao maming dabiani dongjaoba, Sohra-ko Skotong dake gital district-ko songe on·na sorkari chanchienga ine Autumn Session-o a·dokni dakchakgipa Skotong Minister Preston Tynsong-ni parakata ja·man, Dadenggre-o songdongenggipa manderang suk ong·gijaniko parakatenba, GSU Western Zone (North) Dadenggre-ni President iani bidingo a·dokni Skotong Minister-na sedoataha.

Sohra-ko gital district songna chanchienga ine Deputy Skotong Minister-ni parakata ja·man, Dadenggre jolo songdongenggipa manderang ka·a ding·chaoani ong·kattokaha. Maina ru·utbea bilsirangonin Dadenggre-ko district songchina dabiengachim. Uni gisepon, Dadenggre-o songdongenggipa manderangni dabianiko sorkari knachakjaenga ong·ode, maina Khasi Hills-o gital district-ko songani bidingo chanchiskaenga?
Meghalaya a·doko gitchambatsranggipa Civil Sub Division-ara Dadenggre-ma Sohra ine Dadenggre-o songdongenggipa manderang sing·doataha.

Dadenggre-ko district songchina dabianiara gital dabienga ong·ja, indiba a·doko gitchambatsranggipa Civil Sub Division-rangoni damsa ong·pahani giminsa, Dadenggre-kon skang district songchina Dadenggre jolo songdongenggipa manderang dabiengachim. Indiba NPP-chi dilenggipa MDA sorkari mikkang nitee, Sohra-ko district songna miksongengani gimin Dadenggre jolni manderang jegalgrimataha. Maina re·anggipa 2021 bilsioba, Khasi Hills a·jao Eastern West Khasi Hills ine bimingko done, gital district-ko songe on·aha, indiba, Garo Hills-kode nigale watchanggalaha.

Indake ong·engon, iani bidingo GSU Western Zone-ni President Tengsan M.Marak, Dadenggre-ko watchange, Khasi Hills-o gital district-ko songtaina sorkari chanchiengani gimin suk ong·jae, a·dokni Skotong Minister Conrad K.Sangma-na sedoataha. Ian Dadenggre jolni manderangkosan galchanga ong·ja, indiba Garo Hills-ni manderangko gisik saatani ong·a. Maina Dadenggre-ko district songchina ru·uta bilsirangoni dabiengako galchangani ong·a ineba parakataha.

GSU President-ni parakatani gitade, Dadenggre Civil Sub Division-ko 1982 bilsio songaha aro ian Meghalaya a·doko gitchambatsranggipa Civil Sub Division ong·achim. Batanggipa 1999 bilsio Dr. Donkupar Roy-ni Skotong Minister ong·mitting somoionin, Dadenggre-ko district songchina dabiengachim. Apsandake, 2012 aro 2015 bilsirango Dr. Mukul Sangma-ni Skotong Minister ong·mitting somoirangoba changni chang iani bidingo a·dok sorkarina sedoahachim. Uni ja·man, 2018 bilsio NPP-chi dilenggipa Conrad Sangma-ni MDA sorkarinaba changni chang memorandum-rangko on·aha, indiba da·alona kingkingba a·dok sorkari Dadenggre-ko district songe on·kujaenga. Ia dabianiko on·na sikteljaenga baksana Garo Hills-ni manderangko kal·ake roenga, jekon apsangrik man·gnirangko man·na nangachim, uko Garo Hills-ni manderang man·jaenga.

Marak-ni parakatani gitade, Khasi Hills-o gital district-ko songchina maming dabianirang dongja, indiba Khasi Hills-o bang·batakon chu·sokate on·enga, iara Garo Hills-ni manderangko chonnika ong·jama?. Garo Hills-ni manderang man·na kragipako ru·uta bilsirangonin dabienga, indiba sorkari nikchanggalenga. Meghalaya a·dokara dingtang dingtang jatrangni apsan brine songdonggipa ong·a aro pilak development-rangkon apsangrik sualna gita nangachim. Indiba Khasi Hills mangmangko mikkang nitee develop ka·aniara Garo Hills-ni manderangko galchange apsangrik man·na kragipa niam gita ong·jaenga. Dadenggre-ko district songe on·aniara, dabienggipa manderangkosan mande ra·ani ong·aijawa, indiba a·doko apsangrik development-ko on·anisa ong·a.

NPP-chi dilenggipa sorkarini Khasi Hills-o gital district songna miksonganiko ra·chaka, indiba Garo Hills-o jekon dabiengachim, maming dakeba nichanggalna nangja. Khasi Hills-o gital district-ko songgenchimode, apsandaken Garo Hills-oba gital district-ko songna nanga. Maina ru·uta bilsirangonin Dadenggre-ko district songchina dabiani aro ku·rang on·aniko knachakna nangchongmota. Dadenggre-ko district man·na ka·oksie, ru·uta bilsirangonin dabiengoba, sorkari knachakja ong·ode, Garo Hills-ni manderangko nigalasan ong·aigija, a·doko ku·mong nangrimaniko pe·aniba ong·gen. Uni gimin, ia dabianiko gisiko nange ra·china aro manderangni ka·oksie, dabianiko chu·sokate on·china a·dokni Skotong Minister-ko GSU Western Zone-ni dilgipa mol·molataha.