Tura, Sept 27,2024: Batanggimin salrango South West Garo Hills-ni a·jani Deputy Commissioner Hema Nayak-ni mikkangchi fishing competition-ko ong·atanio Taxation Department-na kajina gamna nanggen aro NOC ra·gija ong·atna man·jawa ine ge·etaniko GSMC HQ-ni Assistant General Secretary Tony Balsam Ch.Marak raken jegalataha.

Sixth schedule a·jani ning·o songdonggipa tribal manderang an·tangtangni a·doko pale sime, bading chiwale aro dake rike cha·na jakgitel man·a aro Income Tax Act-ni Section 10 (26)-o Sixth Schedule a·jao songdongenggipa tribal manderang a·jatango jekoba pale sim·e aro bading chiwale man·ako kajina ba tax gamna nangja ine rongtalen janapa gnang.

Uni gimin, Sixth Schedule-ni niamrangko pe·e, district administration an·tangtangni sika gita skatang niamko dondrana ba dakdraanira tribal manderang na on·gimin bilko gimaatani aro tribal manderangko chonnikani ong·a. “Chinga uko ra·chakna man·chongmotjawa. Nanga ong·ode NOC-ko A·king Nokma-rangoniko aro GHADC oniko ra·china. Indian Constitution-ni on·gimin Sixth Schedule-ni ning·o donggipa a·jarangoniko Autonoumous District Council (ADC)-rangsa kajina ba tax rangko ra·na bil gnang, indiba a·dok sorkaride maming dakeba jakdangdikna ba kajina ra·na bil man·ja” ine Tony Balsam Marak parakataha.

Sixth Schedule-ko tribal manderangni bilko dingtangmancha chel·chakna gitasa on·aha, uni gimin district administration-ni indakgipa bilrangchi sinjetdraaniara Constitution-o dongimin, Sixth Schedule-ni niamrangko pe·ani ong·a ine GSMC dilgipa DC-ni kamko jegalataha.