Shillong, June 6, 2025:Madhya Pradesh a·doko donggipa Indore songjinmani bia ka·gital jiksesa Meghalaya-ni Sohra jolo donggipa ‘Double Decker Living Roots Bridge’ ba bol ja·dilni dollongko nina re·bagipa Raja Raghuvanshi-ni sigimin manggisiko June 2 tariko man·ahaoba, uni jikgipa Sonam Raghuvanshi-de da·onaba gimae dongengani gimin, chong·mot a·selko Central Bureau Investigation (CBI)-chi sandianiko dakchina nokni manderang, Indiani Prime Minister Narendra Modi-ko mol·molataha.

Raja aro Sonam May 11 tariko bia ka·ani ja·man, Honeymoon-na May 22 tariko Meghalaya-ona re·baahachim. Uamang jiksesa May 23 tarik attamni 1:45 bajimango nokni manderang baksa bon·kame phone-o agangrikaha, ua attamonin uamangni phone switch off ong·aha aro maming koborkon man·chipjaha. Indake sal 10-ni ja·man, June 2 tariko Cherapunjee-ni Sohra-Rim minggipa biaponiko Raja Raghuvanshi-ni sigimin manggisiko man·aha, indiba uni jikgipa Sonam-kode da·onaba bano gimaenga man·kujaenga. Pulisrang Sonam-ko dondikpilgija sandiengoba, uni gimin maming sakkiko man·kujaenga.

“CBI-chi sandianiko dakchina, chinga a·songni Prime Minister Narendra Modi-na chitti seataha aro Sonam-ko sandichina chinga mol·molaha. Chingni chanchichipani gitade, Raja-ko so·otani ja·man, Sonam-ko rim·gittange ra·angaha. Da·o chinga Sonam-ko naljokate rimbapilaniko nangnikenga” ine Raja Raghuvanshi-ni adatang Vipin Raghuvanshi aganaha.