Shillong, July 2, 2025: Shillong Govt College of Engineering-ko August ja dipet class-rangko a·bachenggnok ine Monggolbar salo Education Minister Rakkam Sangma parakataha.

Monggolbar salo ua, Shillong-o rikenggipa Govt Engineering College aro Shillong Polytechnic-ko niani ja·mano kobor ra·timgiparangna aganaha.

“Da·alo anga official-rang baksa Shillong Engineering College aro Polytechnic-ko nieaha. Ia college-ko nieanio anga college-ni Principal aro college-o kam ka·enggiparangko grongbaaha. Ia Engineering College-o class-rangko ia bilsiosa a·bachengatengani gimin, anga uamangko grongaha,” ine Rakkam Sangma, kobor ra·timgiparangna aganaha.

Education Minister-ni parakatani gitade, Shillong Engineering College-o August jaoni class-rangko a·bachenggnok aro admission-rangko a·bachengmanaha.

“Civil Engineering aro Electrical Engineering course ge·ggninan dam 30 seat-rangko on·china mol·molaniko All India Council for Technical Education, ra·chakaha,” ineba Sangma parakataha.

Nokrangko rikani bidingo sing·anina aganchakaniko on·chakengon, nokrangko matchotmanaha aro da·o AICTE-ni bon·kamgipa permission-na sengkuenga ine Education Minister aganaha.

“Kamrang pilakan matchotmanaha aro AICTE-ni permission-ko man·sojokode, ia college-ko kuliaignok,” ineba Sangma aganaha.

College-o skigiparangni gimin janapatengon, “Mitam skigiparangkode ra·somanaha aro ia College-ni Principal in-charge-ba Shillong Polytechnic-onin ong·gen. College-ni skigiparangkode nangani kri ja·mano ra·dapkugen. Ia college-o qualify ong·gipa manderang dongaha,” ine Education Minister aganaha.

Ia Shillong Govt. College of Engineering-o Civil aro Electrical, Under Graduate Engineering course-rangko a·bachengna gita adita salrangna skangsan AICTE ra·chakaha, ineba ua aganaha.