Shillong, June 11, 2025: Re·anggipa May 23 tariko Indore-ni Raja Raghuvanshi-ko so·otanio jak donggipa uni jikgipa Sonam Raghuvanshi aro gipin sakbri manderangko rim·ani ja·man dos dakanio mongsonggipa Sonam-ko Meghalaya a·dokona rimbae bichal ka·na gita a·dokni pulisrangko, Uttar Pradesh a·dokni Ghazipur-ona watataha.

Koborko man·soani gitade, Sonam-ko Monggolbar salon, Meghalaya a·dokona rimbaaha aro Butbar salo Shillong District Court-o mikkangpaataha.

Sonam, an·tangni segipako so·ote Meghalaya a·dokoni katangpila ja·man, June 8 Robibar walo ua, Uttar Pradesh a·dokni Ghazipur-o donggipa Nanganj Pulis Station-o an·tangko bame on·eaha aro uko Ghazipur-ni hospital-o porikka ra·enba, Ghazipur pulisni ning·o donaha.

Sonam-ko Sombar walon Patna-ona rimbaaha aro Monggolbar salo uko Patna-oniko Guwahati-ona sildorengo rimbae, Guwahati-oni Shillong-ona rimbaaha.

Pulisrangni u·iatani gitade, Raja Raghuvanshi-ni jikgipa Sonam, segipako so·mal done, Raj Kushwaha baksa mikchagrikaha aro uandaken Raja-ko so·ote galna gita ua sakgittam manderangko tik ka·e, Shillong-ona re·baaha.

Pulisrangni am·sandie man·ani gitade, uamangni Meghalaya a·dokona sokbaani ja·man Sonam, Raj Kushwaha-na phone gita kobor-rangko watate, uko so·otna tarie dongaha aro uandaken ia a·selni bidingo Sonam-ko man·chape, dos dakgipa gimik sakbonga manderangko pulisang rim·aha.