Resubelpara, Aug 18,2024:Meghalaya a·dokni gitcham Congress dilgipa aro gitcham Skotong Minister Salseng C. Marak sagina Sonibar salo a·dok gimikni dingtang dingtang political dilgiparang, pulisrang aro dal·dalgipa official-rang Resubelpara Mini Stadium-o bon·kame mande ra·aniko dakangaha.
Indake, Salseng Marak sagina mande ra·aniko dakatanio Tura-ni MP Saleng A.Sangma, a·dokni Skotong Minister Conrad K.Sangma, Education Minister Rakkam A.Sangma, PHE Minister Marcuise N.Marak, Assembly-ni Speaker Thomas A.Sangma, Songsak-ni MLA aro a·dokni gitcham Skotong Minister Dr.Mukul M. Sangma,Mendipathar-ni MLA Marthon J.Sangma, Resubelpara-ni MLA Timothy D.Shira, MDC-rang, Official-rang, Pulisrang aro a·dok gimikni manderang dongpae bakko ra·angtokaha.
Salseng Marak adita jarangna be·enni an·senggijaniko man·ahani gimin, uko Tura Civil Hospital-o sananiko dakengachim, indiba rasong gribee, Sukrobar pringni 10 bajimango an·tangni ka·sagipa dedrang su·drang, chawari demechikrang, ma·drang maharirang aro political dilgiparangko wate jringjrotna neng·takram biapona re·angaha.
Salseng C Marak bilsi 83 ong·ahaon, be·eni sabisiko man·e August 16 tarik pringo a·gilsakko watangaha. Ua 1993-oni 1998 bilsiona Meghalaya a·dokni 6-gipa Skotong Minister ong·e jat aro a·songna dangdike on·angaha. Ua Meghalaya a·dokni saksa niksenggipa dilgipa ong·achim. Uni Skotong Minister ong·mittingo chong·motan, 1995 bilsio skanggipa Garo Hills-o bobil dake chakatgipa A·chik Liberation Matgrik Army (ALMA) bobil dolko tom·tomaniona okame, Garo Hills-o tom·tomaniko ra·badilchenggipa ong·achim.
Indake, Salseng C.Marak-na bon·kame mande ra·aniko dakani salo a·dokni Skotong Minister Conrad K.Sangma tom·bagipa manderangna aganprakangengon, a·doko saksa niksenggipa dilgipani sianganichi a·dokna dal·bea gimaani ong·a aro uni a·dokna on·gilanggimin kamrangara pangnan gisik ra·kamani ong·gen. Ua a·dokni namroro silroroanina aro a·doko tom·tomanina rakbee kamrangko ka·gipa saksa dilgipa ong·achim. Uni namgipa kamrangko pangnan gisik ra·na krachongmota. Salseng Marak jat aro a·songna dangdike on·angkuna miksonganio, re·anggipa 2013 bilsio Resubelpara constituency-o bon·kame MLA-na susaahachim, indiba chena gita man·jaha. Ua bang·a bilsirangna MLA ong·an baksa Skotong Minsiter ong·e, a·dokna dangdike on·angaha aro ua a·dokni political history-o an·tangko niksengataha ine Skotong Minister aganangaha.
Ua da·o a·gilsako dongjahaoba, uni namgipa kamrang sakantio pangnan dongkamgen. Uni namgipa kamrangko ja·rike jat aro a·songni silroroanina aro tom·tomanina kamrangko ka·anggen. Ua saksa skulo skigipaoni political a·baona kingking an·tangko on·kange jat aro a·songna dangdike on·angaha. Ua sontolgipa, name chanchina changgipa aro mandena ka·sagipa dilgipa ong·achim ine Skotong Minister agandapangaha.
Uko bon·kame mande ra·aniko dakenba, uni manggisiko donchakgipa bokosni kosako a·songni Nisan ba Flag-ko done, Salseng Marak-ni manggisiko songtang Resu Gajingpara gopramo gopaha.
