Tura, Sept 8, 2024: Rongbakgre, Governor House mikkango donggipa petrol pump sambao, A·chik Concious Holistically Integrated Krima (ACHIK) HQ, Tura-ni gital Office nokko September 7 tariko oprake ba nokdonggae on·angaha.
Ia office-ko nokdonggae on·ani somoio Fr. Januarius S.Sangma mongsonggipa sokgipa ong·e, bak ra·angaha. Una agreba GSMC-ni Acting Chairman Balkarin Ch.Marak aro gipin dingtang dingtang NGO-rangni dilgiparangba dongpae bakko ra·angtokaha.
Ia ACHIK-ni gital Office-ko nokdonggae on·anio Fr. Januarius Sangma mongsonggipa sokgipa ong·e, bi·chakan baksa namgipa agan ku·pattianiko on·angengon, Organisation-ko dilanio chu·sokgipa ong·na gitade, ku·monganiko nanga. “Anga da·alo na·simang baksa ong·e, na·simangna bi·chakna kusi ong·a. Na·simang nama miksonganio ia ACHIK organisation-ko bikotaha aro na·simang namgipa nokko kam ka·chakna gita man·aniara, Isol-ni pattiani ong·a. ACHIK, gimaangenggipa A·chik jatni pilak daka rikanirangko nambate ripingangna, dingtang dingtang biaprango ba a·aongrango songdongenggipa A·chikrang ku·monge kamrangko ka·na ja·ku de·aniara namen nambegipa miksongani ong·a. Anga an·tangba dingtang dingtang a·songrango ba biaprango donggipa A·chik ripengrangko bang·en ma·sia, uni gimin na·simang uamang baksaba ku·monge kamrangko ka·na gita man·gen. Ia na·simangni nambegipa miksonganina angaba bi·chakanio pangnan gisik ra·gen. Na·simangni mikkangchi kam ka·anirango tom·tomgipa aro chu·sokgipa ong·china” ine Fr. Januarius Sangma aganangaha.
Na·simang ia ACHIK Organisation-ni Constitution-ko tarimanenggnok aro ia Constitution-ko A·chik Ku·chi sena man·ode nambatgen, jedakode, A·chik sakantian na·simangni niam reti-rangko aro miksonganirangko altubate ma·sina man·gen. A·chikrang da·ode, skia man·gipa bang·en dongaha. Uni gimin niam-reti ba ainko ma·sigipa manderangko donna man·ode nambatgen, maina basakobade na·simangna neng·nikanirang sokbanaba donga. Uarangko niksamsoa gnang kamrangko man·gen ineba Fr. Januarius agandapangaha.
Balkarin Marak-ba tom·anio dongpae, jinmana aganangengon, batanggipa salrango A·chik a·songo namen so·sojengjeng ong·achim. Ua somoio toromni gita A·chik a·songni tom·tomanina, rakbee kamko ka·dilgipa Fr. Januarius Sangma ong·a, uni rakbee kamko ka·dilanichi, dingtang dingtang toromni dilgiparang, apsan ku·monge kamko ka·anichi A·chik a·song da·alo tom·tomaniko man·aha. Fr. Januarius saksa A·chik ong·pae, jat aro a·songni tom·tomanina Isolo bi·chake kamko ka·aha. Uni gimin Fr. Januarius gita dakgipa A·chik Matgrikko A·chik a·songo bang·en nangkuenga. Ua da·alo ACHIK organisation-ni office-ko nokdonggaao dongpae bi·chakanichi ACHIK Organisation chu·sokgipa ong·gen. Uni gimin, hai A·chik sakantian jat aro a·songni namgnina apsan ku·monge kamko ka·angna ine GSMC-ni dilgipa ku·mongdilangaha.
