Tura, Jan 25,2025:South Garo Hills a·jani Chokpot jolo donggipa Rekonanggre songo JJM-na on·atgipa tangka paisarangko jakkalsretani a·sel JJM-ni kamko matchotgija donengani gimin, A·chik Holistically Integrated Krima (ACHIK) Council Sangknigre Regional Unit, Contractor aro Official-rangni kosako Sangknigre Pulis Station-o badi (FIR) ka·doangaha.

ACHIK Council Sangknigre Regional Unit-ni President Mansrang Ch.Marak-ni badi ka·anio janapatani gitade, Rekonanggre songo JJM-ni kamrangna tangka gong 74,07,540-ko chamatahachim, indiba ua tangkarangko ong·gija dake jakkalsretani a·sel kamrang matchotna man·jaha.

Rekonanggre JJM Scheme-ni ning·o Zonal Reservoir-ko kadulna gita gong 9,32,150 tangkarangko chamatahachim. Uamangni RTI-na aganchakanio kamrang matchotaha ine parakahaoba, Zonal Reservoir-ko kadula dongja ine ACHIK Council Sangknigre Unit-ni President parakataha.

RCC Ringwell-ko rikani gimin janapatengon, Detail Project Report (DPR)-ni gitade, RCC Ringwell-ko meter 12 tu·e kitna nangachim, indiba ringwell-ko meter 3-san tu·e kitani a·sel songgimikna chirang chu·ongjaenga aro ian tangka jakkalsretaniko mesokani ong·chongmota ine ACHIK Council-ni dilgipa parakataha.

Una agreba ACHIK Council Sangknigre Regional Unit-ni parakatani gitade, ua biapona rama tarina gita gong 94,200 tangkarangko chamatahachim, indiba ua biapona rama tarianga dongjachim.

Indake tik ong·gijagipa kamrangara tangka paisa jakkalsretaniko mesokanisan ong·aija, indiba songo noko songdongenggipa manderangni namgnina ma·mong sorkarini on·atgipa kamrangko rusigalani ong·a, ine ACHIK Council Sangknigre Regional Unit-ni President parakatenba, kam ka·a tik ong·gijagipa Contractor aro Official-rangni kosako rakgipa ja·kurangko de·china Sangknigre Pulis Station-ni Officer-Incharge-ko didiataha.