New Delhi, July 14,2025: Karnataka a·doko donggipa Uttara Kannada a·jani Kumta Taluk songni Ramatirtha a·bri rong·kolo dongenggipa, Russia a·songni me·chikma aro uni bi·sarang sakgniko nikenba pulisrang jokataha.

Bilsi 40 ong·gipa Russia a·songni me·chikma Nina Kutina, jekon Mohi ineba mingachim, ua India-ona bading chiwalna aro Gorkarna-ni rongtalgipa coastal songjinmako nina Goa gita re·bae, Hinduism aro Indian spiritual tradition-rangni gimin ning·tue chanchina a·bachengaha, ine PTI-o parakaha.

Ua rong·kolo antigni mangna uni demechik bilsi 6 ong·gipa Preya aro bilsi 4 ong·gipa Ama baksa dongaha.

Uamang ma·ningsa sakgittaman, ning·tugipa buring jatchio donggipa gadang gadang dake ong·telaigipa rong·kol bangbango dongna a·bachengaha. Mohi rong·kol ning·o dingtangmancha jokataniko aro tom·tomaniko man·na gita, Rudra miteo bi·aha aro Puja ka·e olakkienba, ua an·tangni dedrang sakgniko rong·kol ning·o dongdilengachim.

Sukrobar salo Circle Pulis Inspector Sridhar aro uni dol a·a be·grue a·sel ong·ronggipa biaprango re·roroe nirokaniko dakengmitting somoio, rong·kolni ku·mango ba·ra ramako nikaha. Ramartirtha a·brini diltugipa buring bolgrimo ba·ra ramako nikate, Pulis officer, sambaona re·angon, Mohi aro uni dedrang sakgni rong·kolo dongengako nikeaha.

Uttara Kannada a·jani Superintendent of Pulis, M Narayana, Sonibar salo PTI-na indake aganaha. “Chingni patrol team re·roroe nirok sandianiko dakengmitting somoio Ramatirtha a·brio donggipa rong·kolni a·palo saree aro gipin ba·rarangko dingdee ramako nikaha. Jensalo pulisrang ua rong·kolona re·angahaon, Mohi baksa uni demechik sakgni Preya aro Ama-ko rong·kolo nikeaha” ine SP aganaha.

“Ian aiao inman·pilani ong·a, ua aro uni dedrang sakgni buringo maidake janggi tangaha aro uamang maiko cha·aha. Uamangni buringo dongmitting somoio una aro uni dedrangna mai obosta ong·enggen, mittelana agre mamingkon aganani dongjajok” ine pulis officer aganaha.

Official-ni chanchichipani gitade, ua Goa-oni re·angmitting somoio rama brange rong·kolona sokangaha. Pulisrangni sing·sandianina ku·chakani gitade, Indiao dongenba, 2017 bilsion uni visa bon·changaha. Narayana indake aganaha, “Chinga uamangko Sadhvi-ni Ashram-o biap tarie on·gen. Chinga uamang ma·ningsa sakgittamko Gokarna-oniko Bengalruru-ona ra·anggen aro a·songtangchi watatpilna kamrangko ka·enga” ine Pulis officer parakaha.

Iani bidingo bil gnanggipa authority-rang, Russian Embassy-na kobor on·ate a·songtangona watatpilgen ine pulis official parakataha.