Tura,July 4,2025:Kobor man·soani gitade, re·anggipa antio, West Garo Hills a·jani Raksamgre Civil Sub-Division-ni ning·o, bilsi 16 ong·gipa me·chik bi·sa saksako, rim·drae ra·angenba drae til·ekaha. Ua a·sel ong·ani ja·man, dos dakgipa mandeni kosako Tikrikilla Pulis Station-o badi ka·aha aro dos dakgipa mandeko pulisrang rim·aha.
Koborni gitade, ua me·chik bi·sa, re·anggipa June 30 tarik pringwalni 3:30 bajimangonin nokoni gimaaha aro iani bidingo nokdangni manderang, July 2 tarikosa badi ka·aha.
Ua me·chik bi·sani gimaani ja·man, uni nomber-ona phone ka·e nion, uko rim·drae ra·anggipa Balsring K Sangma-sa uni phone-ko ra·chakaha ine me·chik bi·sani ma·gipa pagipa aganaha.
Uni ja·man, me·chikni ma·drang, dos dakgipa mandeni nokona re·angon, me·asani ma·drangrang, atte aro gantongrangko ra·e sengsoskaaha aro uamangko chadrapsoaha ineba u·iataha.
Badi ka·anio parakani gitade, me·asani ma·drangrangni chadrapanio, me·chikni pagipa saknaako man·aha, indiba uamang me·chik bi·sakode ua nokoniko rime ra·bana man·aha.
Ua me·chikko me·asa, uni nokoniko rim·drae ra·angenba drae til·ekaha aro uko ka·mikkenataha ineba badi ka·anio janapaha.
Ua a·selni bidingo Tura Women Pulis Station-o ka·aha aro dos dakgipa me·asako rim·aha ine West Garo Hills a·jani SP Abraham T Sangma parakataha.
