Shillong, June 26,2025: Meghalaya a·dokni Special Investigation Team (SIT), Raja Raghuvanshi-ko Sorah-o so·otani bidingo sandianirangko dakengon, rim·a man·gipa Silom James-ni parakanichi .32 pistol ge·sa, guli ronggni aro gong 50,000 tangkarangko Butbar salo man·aha.
Sonam-ni jolao dongipa tangkarang, sonarang, mobile phone aro pistol-ko SIT, adita salrangna sandiengachim. Raja-ko so·otani ja·mano Sonam an·tangni dongnue chakgipa noko uarangko donbaaha. Raj Kushwaha aro gipin sakgittamko rim·anii ja·mano, June 8 tariko Sonam ua nokoni katange June 9 tariko Uttar Pradesh-ni Ghazipur pulisna an·tangko bame on·ani ja·mano Meghalaya Pulis uko jako ra·aha.
Silom James, Butbar salo silai donchakgipa biapona Pulisrangko rimange mesokaha. Indake sandianiko dakangon, Silom James-ni i10 garioniko gong 50,000 tangkarangko man·aha. Ua tangkarangko Raj Kushwaha-ni laptop bag-oniko ra·aha ine James ku·chakaha.
Pulisrang kamgimin laptop bag-ko man·aha, indiba laptop-kode man·kujaenga ine Khasi Hills a·jani SP Vivek Syiem parakataha.
Laptop-ko soroksamo goe galataha ine James aganaha. Ua laptop bag-ko adita salrangna skang, SIT Indore-ni MR3 Hare Krishna Vihar-o so·gimin bag baksa apsan meliaha. Pulisrangni aganani gitade, ua bag-o tangka lak 5, pistol ge·sa, Sonamni phone aro Raja-ni sonarang dongachim.
Budbar salo pistol aro adita tangkarangko man·anichi pulisrangni agananirang kakket ong·a ine mesokaha. A·sel ong·ani sakkirangko nosto ka·e galanina SIT, Silom James, security guard Balbir Ahirbar ba “Ballu” aro Sonam-ni dongnue chakgipa nokni nokgipa Lokendra Singh Tomar-ko, rim·aha aro uamangko ta·raken Shillong-ona rimanggen ine Meghalaya Pulis parakatenba, Silom James aro Ballu-ko sal 7-na aro Lokendra Singh Tomar-ko salgittamna rimbana on·enga ineba u·iataha.
Raja-ko so·otanio mongsongbate dos dakgiparang Sonam Raghuvanshi aro Raj Kushwaha aro gipin sakgittam manderang Vishal Singh Chauhan, Akash Rajput aro Anand Kurmi ong·achim.
