Political dolrang election-ni somoiosa manderangko dal·e ra·a, election ja·mande gualaia: Saleng

Shillong, Oct 20, 2024: Tura-ni MP aro Congress dilgipa Saleng A Sangma, political dolrangko election-ni somoio tamasa dake rona man·a, election matchotahaode manderangna ku·rachakanirang bon·aignok ine aganaha.

“Political party-rang election-ni somoiosan tamasa dakna man·aia, idnbia vote pu·ona ja·mande, kam ka·giparang chong·motan party worker-rang aro vote pu·ongiparang saksakoba dal·e ra·ja”, ine Saleng Sangma aganaha.

Election-ni somoiosan manderangko vote man·na mangmang manderangko dal·e ra·a dakaia, indiba jensalo election matchotaha, darangba ramram manderangni neng·nikaniko niatja aro knachakja. Gambegre by-election-ni giminsa manderangoniko vote man·na nama nama kattarangko agane, manderangko ropenga ine Saleng Sangma matnangaha.

“Election-ara darang party-ni gisepo ong·ja, indiba candidate-rangni nama aro namgijaosa pangchaka. Je candidate-an a·dok-chigana aro manderangna dangdike on·aosa pangchaka” ineba Congress dilgipa janapataha.

Darang candidate-ni mikkango NCP ba NPP-ni chin dongja, uni gimin jensalo candidate-rang suaenga, unon NPP, Congress aro TMC susagrikenga, indiba manderangsa an·tangtangna dilgipako seoka.
Indaken, Gambegre by-election-o Congress Jingjang M Marak-ko candidate on·e susaatenga.

Jingjang Marak re·anggipa 2013 aro 2018 bilsini Assembly Election-o Rangsakona aro South Tura-ni Independent Candidate ong·e susaaha. Indake, da·o Gambegre by-election-oba Congress candidate ong·e susagen. Gambegre by-election-ko re·baenggipa November 13 tariko ong·atgen aro November 23 tariko vote-ko changen ine Tura-ni MP parakataha.

Saleng A Sangma, Gambegre-ni MLA ong·e, ia bilsini Lok Sabha Election-o Tura Parliamentary seat-oni susae MP cheani ja·man, Gambegre-ni MLA-ko watna nangaha aro Gambegre Constituency-o MLA gri bangbang ong·ahani gimin, da·o Gambegre by-election-ko ong·atna nangaha.

Gambegre by-election-ko ong·atna Election Commission of India October 18 tariko election-ni notification-ko on·aha aro nomination file ka·ani bon·kamgipa tarik October 25 tarikko on·aha. Gambegre Constituency-o chu·gimik sak 32,254 voter-rang donga. Uarangoni sak 16,331 me·asarang aro sak 15,923 me·chikrang ong·a.

Loading

LEAVE A RESPONSE

Your email address will not be published. Required fields are marked *