Raksamgre,June 25,2025: West Garo Hills-ni Raksamgre Civil Sub-Division-ni ning·o donggipa Rengigre songni Pirot R Marak-ni manggisiko June 12 tariko bilpile, uni siani bidingo sandianirangko dakani ja·mano sakbri manderangko rim·aha.
Pirot Marak-ko gopgimin manggisiko bilpilani ja·mano, Sub-Divisional Medical and Health Officer, Dr. Silang Lama R.Sangma post mortem ka·aha aro post mortem reportko West Garo Hills a·jani Superintendent of Police, A T. Sangma-na on·ataha. Pulisrangni sandie man·siani gitade, Pirot R. Marak gitoko sikgeke siataha aro uni private be·enni bak ronggnian binekaha ine ma·sina man·aha.
Uandake, Pirot Marak-ko so·otanio jak donggipa sakbri manderangko June 24 tarik pringo uamangko rim·aha ine SP AT. Sangma parakataha.
Rim·a man·gipa manderanga Pirot sagini jikgipa Nennen R. Marak, Nennen Marak-ni jonggipa Sengba R. Marak, Nennen Marak-ni adatang Lepson R. Marak aro Nennen Marak-ni mikchagipa me·asa Reknan K. Sangma ong·a, ine Officer-in-Charge Rozarius G. Momin parakataha.
Dos dakgipa sakbri manderangko June 24 tarik salo katchario mikkang pa·ataha aro uamangko katchari salgittamna pulisrangni ning·o donataha. Da·o dipet uamango sing·anirangko dakkujaenga ine pulis officer aganaha.
Raksam Maharirangni aganani gitade, “Post Mortem report-o so·ota ine parakahani gimin, chinga uko nokon so·otaha ine ma·siaha aro uni manggisiko noktangon nikaha. Uni jikgipa aro nokni manderangan Pirot-ko so·otanio jak dongna nanga” ine maharirang chanchichipenga.
Uni gimin, sianggipa Pirot Marak-na aro uni Maharina kakket bichalko ra·bana nanga ine maharirang dabiangenba, iani bidingo pulis department, kakket bichalko ra·bachongmotgen ine maharirang ka·donganiko parakataha.
