Tikrikilla, June 27, 2025:: West Garo Hills a·jani Raksamgre Civil Sub Division-ni ning·o donggipa Rengegre songo Pirot R.Marak-ko uni jikgipa Nennen Marak aro uni mikchagipa Reknan K.Sangma aro gipin sakgni Nennen Marak-ni adatang aro jonggipa re·anggipa April 14 tariko so·otani gimin, sianggipa Pirot Marak-ni ma·drang May 7 tariko Tikrikilla Pulis Station-o badi ka·ani ja·man, katchari Pirot Marak-ni manggisiko June 12 tariko bilpilchina ge·etaniko on·aha.

Katcharini ge·etaniko man·e, Raksamgre Civil SDO-ni dilachi Tikrikilla-ni pulisrang Pirot Marak-ni manggisiko bilpile, postmortem ka·e nion, uko so·otasa ine report-ko on·ahani gimin, Tikrikilla Pulisrang sianggipa Pirot R.Marak-ni jikgipa Nennen Marak, uni mikchae sel·enggipa Reknan K.Sangma, Nennen-ni adatang Lepson Marak aro uni jonggipa Sengba Marak-ko chanchichipanio rim·aha aro uamangko salgittam pulisrangni ning·o done sing·sandianiko dakna rakkiaha.

Uni gisepon, Pirot sagini ma·drang mahari Pirot Marak-ko kragija so·otgipa sakbri manderangko rim·e salgittamna pulis custody-o donengani gimin, ka·a chakna amjae, ua manderangko ta·rake sing·sandianiko dakenba, kakket bichalko on·china dabie, Bristibar salo NGO-rangko okamate, Tikrikilla Pulis Station-ni Officer-in-Charge, Phulbari-ni Circle Inspector (CI)-ko grongenba, dos dakgipa manderangko ta·rake bichal ka·china dabiangaha.

Sianggipa mandeni mahari ma·drang aro NGO-rangni dabia gitan, Pulis officer-rang, “Chinga pulisni gita rim·a man·gipa manderangko sing·sandienga. Uamangko salgittamna chingni ning·o done sing·anirang Sukrobar salo bon·aha, indiba uamangni aganchaka chu·ongkuja ong·ode, chinga court-o bi·e, custody-ona rimbapilgen. Chinga chingni dakna nanggni kamrangko ka·enga, bebegita uamang sakgipin manderangba donga ine aganode, chinga ua manderangkoba rim·kugen aro man·adipet sianggipa Pirot Marak-ni mahari ma·drangna kakket bichalko ra·bana jotton ka·enga aro chinga ia kamrang chu·sokgen ine ka·doenga” ine Phulbari Pulis Station-ni CI kobor ra·timgiparangna aganaha.

Sianggipa mandeni wanggipa Pa Turendro Sangma-ni aganani gitade, re·anggipa April 14 tariko Nennen aro Reknan Sangma-ni kragija sel·grikani bidingo, Chinga maharini gita agan-ku·pattie on·na re·baha aro uni mi-bijak song·e on·ako cha·e ringe, agan-ku·pattiani ja·man, walni 10 bajio re·angpilaha. Indake chinga nokona 12 bajio sokon, na·songni depare Pirot-de sijok na·song re·bapilbo ine kobor on·ataha. Una walon chinga Pirot aro Nennen-ni nokona re·bapilaha. Indiba sidaldal ong·ani gimin maming doka satani dagiko nikajaha, indiba pringode gitok ripomako, sko matako aro janggilo an·chi kamako nikaha. Chinga doke siata ine ma·sioba, tanggipa manderangko mikkang nie, sianggipako jawa chane, songo noko mahari ma·drangko so·sojengjeng ong·atna sikjae, case ka·gija gope galaha. Indiba sianggipani adatang ja·mano bang·a kattarangko knae, ka·a chakna amjae, kakket bichalko man·na chingko ku·monge, May 7 tarko mokordoma ka·aha, indake May 28 tariko Court-ni ge·etaniko man·e, June 12 tariko Pirot-ni manggisiko bilpilaha aro postmortem report-o chingni chanchia gitan manderang so·otaha ine rongtalen report-ko on·aha. Uandake pulisrang postmortem-o pangchake chanchichipanio sakbri manderangko rim·aha. Uamangko rim·e, salgittamna pulis custody-o donengani gimin chinga ka·a chakna amjae, uamangko ta·rake sing·sandianiko dakenba kakket bichalko on·china, chinga Pulis officer-rangko gronge iani bidingo agangrikna da·alo Tikrikilla Pulis Station-ona re·baha” ine Pa Sangma aganaha.

NGO-rangni nangnikaniara, sianggipa nokdangni mahari ma·drangna kakket bichalko ra·bana nanga aro dos dakgipa manderangko niam gita sasti on·na nanga ine dabiangenba, pulisrang kakket bichalko on·na man·kuja dipetna dabianiko dontongjawa aro iako chu·sokataja ong·ode, dal·a public Meeting-rangko ong·ate jegalanirangko dakna nangao ga·aknaba donga ine GSMC Pedaldoba Regional Unit-ni Chairman Pa Rimjen Ch.Sangma aganaha.

Indake ong·engon, NGO dilgiparangni pulis officer-rang baksa agangrikanio Pulis officer-rang bilaken kamrangko ka·gen ine ka·dongatani kattarangko ku·rachakataha, ine Sangma parakatskaha.