Shillong, June 23, 2025: Bilsi 2023 aro 2024-ni Performance Grading Index (PGI) ranking-o Meghalaya a·dok bon·kamgipa biapko man·aniara, lekka porani kamrango NPP-chi dilenggipa, MDA sorkarini chu·sokgijaniko mesokani ong·aha ine Meghalaya Pradesh Youth Congress (MPYC) matnangataha.

Bilsi 2023 aro 2024-ni PGI ranking-ko Union Education Ministry-ni mesokani gitade, PGI-o Meghalaya a·dok, National Category (Grade Akanshi-3)-o 417 Point-rangkosan man·e, a·song gimiko bon·kamgipa biapko man·aha.
Iani bidingo a·dokni Skotong Minister Conrad K Sangma-ni dilenggipa MDA sorkariko matnangatenba, “PGI ranking-o Meghalaya a·dok indake bon·kamgipa biapko man·aniara a·dokni chadamberangna lekka porako on·anio MDA sorkarini chu·sokgijaniko mesokani ong·enga”, ine MPYC-ni President Timjim K Momin parakataha.

A·doko lekka porani kamrangko ka·anio tangka paisa jakkalsretani aro ku·rachakatangko chu·sokatna man·gijaniko mesokani ong·enga ine Momin matnangataha.

MPYC President-ni parakatani gitade, a·doko lekka poraniko tang·doatna changni chang a·dok sorkari ku·rachakanirangko dakahaoba, da·alona kingkingan dingtang dingtang skulrango ritchani ritcha skigiparangni kamrang bangbang ong·e dongkuenga aro bang·bata songadamrango skul nokrang namgijarangko, bijoli gri, paikana gri, chi gri ong·anirangko nikna man·kuenga.

Skigiparangna training ba skie on·anirang dongja, somoi gita dormaharangko on·ja aro gipin nanganirangna dakchakanirangko on·jani a·sel, skigiparang neng·nikanirangko chagrongtokenga ineba Momin parakataha.

Meghalaya a·dokni PGI ranking-o tang·dogijani a·selara a·dok sorkarini chu·sokgijaniko aro a·dokni chatro chatrirang, ma·a paarang aro skigiparangko cha·bokanichi indakgipa obosta ong·enga ine parakataha.

Ia bilsini SSLC porikkao Pass Percentage 87.10% gapaniara, MDA sorkarini chu·sokgijanirangko donnuna, bakkandikgipa ramako sandianikosa mesokani ong·a ine MPYC-ni President matnangataha.

“SSLC porikkao pangna bilsian 55 ba 57% percent-ni gitasan chatro chatrirang pass ka·rongaiachim, indiba ia bilsio a·dok sorkarini ra·gatgipa ‘CM IMPACT’ guidebook-chi 87.10% percentage chatro chatrirang pass ka·na man·aha. Indiba iako bang·bata skigiparang aro u·i-ma·sigipa manderang, ‘cha·bokani’ inesa agantoka, maina SSLC porikkao sorkarini on·gipa guidebook-onikosa sing·anirangko ra·aha”, ine Momin parakataha.

Indake, State Education Commission (SEC)-ni sandie man·anirangko, ku·pattianirang aro biterangko jinmana parakchina, ‘CM IMPACT’ guidebook-ko jakgitele nipilna gita cholko on·china, skigiparangna bilakgipa training-rangko ong·atchina, bangbang dongenggipa skigipani kamrangko gapatchina aro Education department-ni gita skulrangko nirokjringchina MPYC dabiangaha.