Tura, Sept 15, 2024:Garo Hills Autonomous District Council (GHADC)-ko chalaienggipa NPP-ni Executive Committee, name chalaina man·jaode aro kam ka·giparangna dormaha on·na man·jaode, GHADC-ko BJP-na wate on·srangbo, BJP GHADC-ko chalaiskagen, ine Tura-ni BJP MDC Bernard N.Marak parakataha.
GHADC-o kam ka·giparangna 5th Pay Commission-ni dormaharangko on·na NPP, re·anggipa 2018 bilsion notification-ko on·aha aro Budget-oba 5th Pay Commission-ko on·na pass ka·aha. Indiba 2018 bilsionin gitcham Executive Committee-rangni cha·boke, 4th Pay Commission-o dormaha on·akon, da·onaba GHADC-ni Executive Committee, kam ka·giparangni dormaharangko apsan 4th Pay Commission-o kal·ake on·enga ine Bernard Marak matnangataha.
GHADC-o tangka paisarangna neng·nikanirangko BJP-sa namatna man·gen. GHADC-ni bilgrianiko janape NPP bang·a changon ma·mong sorkarina u·atronga. “NPP Minister-rangni ma·mong sorkarina seatgipa chittirang, ango sakki donga” ineba Tura-ni MDC parakataha.
Uni gimin, “NPP, GHADC-ko chalaina man·jaode, BJP-na pakwate on·srangbo. Kam ka·giparangko kal·steke aro cha·boke ronabe. Chinga GHADC-o neng·nikanirangko namatna kamrangko ka·skagen aro chinga ja 6-ni gisepon GHADC-ko bilakatpilna man·gen” ine Marak a·kangataha.
