Tura, Oct 7,2024: West Garo Hills a·jani Dalu C&RD Block-ni ning·o donggipa Kherapara, Murigre, Songjelpara, Chongpot Dopogre, Gorangre songrangna, Flood Relief Material-rangko West Garo Hills District Food & Civil Supply Inspector Gracifield K. Sangma baksa GSU Dalu Unit-ni Volunteer-rang chi bananichi neng·nikaniko man·enggipa manderangna Robibar salo cha·ani ringani aro dingtang dingtang bosturangko on·gilangaha.

Unbaksana Garo Hills-ni bang·a dingtang dingtang Civil Society-rang, Mondoliko dilgiparang aro NGO-rang uamangni man·a gita on·gilangtokaha. Salgnina kingking mikkarang dondikgija wa·ani a·sel chirang dal·bae bana re·anganichi Garo Hills-ni bang·a songrangon nok jamrang nosto ong·atako man·tokaha, indake bang·a manderang nok jam gri, cha·a ringa gri duko ga·akenggipa nokdangrangna Food & Civil Supply-ni Inspector dakchakani on·a baksana ka·dimeatani kattarangko agane, Isolo bi·chakangaha ine GSU Dalu Unit-ni Vice President Pantora R Marak aro Assistant General Secretary Cherikam R Marak u·iataha.