Tura, Oct 9, 2024: A·chik Dedicated Integrity Leaders (ADIL) Phulbari, a·kawe jolrango niamgri aro maming pangckani lekkarang gri, darangoba sing·cheng sanchenggija, skatang a·arangko cho·e Assam a·dokona salangan GHADC-ni lekkarang gri Ita karkanarangko chalaiengani gimin GHADC-ni Deputy CEM Nikman Ch.Marak-na badi ka·dongaha.

Phulbari jolni ADIL dilgiparangni parakatani gitade Rajabala, Phulbari, Chibinang, Bamundanga, Nidanpur aro Tikrikilla jolrango skatang niamgri a·arangko cho·e, Assam a·dokona salangenga aro Ita karkanarangko chalaiengachim.

Assam-ni manderang, GHADC-ni maming lekkarang gri A·chik a·songni chonchongipa bolrangko den·rimrime salangenba, ua bolrangchi Ita-rangko so·enga. Uni gimin GHADC-ni gita ta·rake sandianiko dakenba dontongatchina ADIL, GHADC-ni Deputy CEM-ko didiataha.

Assam a·dokni manderang skatang A·chik a·songona nape niamgri kam ka·anirangko champengatjagenchimode, mikkangchi A·chik a·songni bol wa·arang bon·gnok aro chiring chibisikrang tipgnok, uni gimin jemangan niamni a·palo kamrangko ka·engachim, niam gita raka sastirangko on·china, ADIL dabiangaha.