Chokpot, June 20, 2025: Chokpot jolni nangrimgimin dol 7 NGO-rang, Bristibar salo Bandaregre RMSA Higher Secondary Skulni Science aro Math skigipa Hannan Sheik, skul ka·a tik ong·jaenga ine bang·a manderangni complaint-rangko man·e, Bandarigre RMSA Higher Secondary Skulona re·ange sing·sandianiko dakon, ua skigipa, Hat Singgimari-ni ong·a aro bilsio salgittamrangsan re·bae, skul ka·enga ine ma·sina gita man·aha.
Hannan Sheik, skigipani kamko ka·chengaonin, bilsio salgitamrangsan re·bae skiengachim, ine NGO-rang nikna man·aha. Uandake Sheik-ni Skul ka·a tik ong·jani gimin, Education department, re·anggipa 2024 aro 2025 bilsio una changgni show cause notice-ko on·aha, indiba, ua skul ka·na gisiko nangjaengahani gimin, uni palo sakgipin skigipako rakkiskachina, South Garo Hills-ni District Skul Education Officer (DSEO)-ko didiatenba, Hannan Sheik-ni kamko bon·atsrangchina NGO-rang dabiangaha.
Chokpot-ni nangrimgimin NGO-rang uni palo sakgipin Science aro Math skigipako ta·rake rakkienba, poraienggipa chatro chatrirangna skie on·skatchina dabiangan baksana, ua skulo Economics skigipa da·alonaba dongkujaenga ine janapatenba, Bandarigre RMSA Higher Secondary Skulo, Economics skigipako ta·rake appoint ka·e on·china, gitaba NGO-rang dabiangaha.
Unbaksana, Tura-oni Chokpot-ona dakanggipa ramao rikenggipa Rongku dollongko bilsi 12 ong·piloba da·onan matchotkujaengani a·sel Chokpot jolni manderang re·a doanio namen neng·nikaniko man·enga ine, complaint ka·atahani gimin NGO-rang ua dollongkoba, Bristibar salo re·ange nieaha aro contractor, Predik Sangma-ni kosako raka ja·kuko de·china aro ta·rake kam matchotatchina NGO-rang, PWD department-ni authority-rangko didiataha.
Chokpot jolni manderang ua dollongko rika matchotjani a·sel, namen neng·nikaniko man·enga aro mikkangchi indake tik ong·gijagipa contractor-rangko sorkari black list-o donna nanga ineba NGO-rang dabiangaha.
