Resubelpara, Nov 19, 2024: North Garo Hills, a·jani Resubelpara Constituency-ni ning·o donggipa Chorebolbok songo, Mahatma Gandhi National Rural Guarantee Act (MGNREGA)-ni kamrangko tik ong·e ka·jani gimin namen kajia golmal ong·enga ine koborna u·iataha.
Koborni gitade, Village Employment Council (VEC)-ni President aro Secretary, manderangni tik ka·gimin gita kam ka·jani gimin, kajia ong·na a·bachengaha. Songni manderang meeting ka·e, songni ramako CC road tarina jinma tik ka·e, jak songe ra·chakahachim, indiba VEC-ni Secretary an·tangni sika gita srik srik gipin ramako tarina Geotag ka·e, an·tangni man·gnina kam ka·ahani gimin matnange, Secretary-ni kosako badi ka·doange, kajia ong·enba, kamko dontongna nangaha.
VEC Secretary, songni manderangni meeting-o CC road on·na tik ka·enba, jak songe ra·chakgimin ramako tarigija, an·tangni namnikgipa ramako srik srik kam ka·ani a·sel, indakgipa kajiarang ong·aha. Iani bidingo songni manderang agane ra·paoba, VEC-ni Secretary adita manderangko chimonge, namgnina agangipa manderangko dokaniara kraani ong·ja ine songni manderang Secretary-ni kosako raken jegalataha.
Ma·mong sorkarini on·atenggipa Scheme-ko ong·gija dakna nangja, ine Self Help Group (SHG)-ni Village Organisation (VO)-ni President aro Bookkeeper, Block office-na badi ka·ahaon, ong·gija daknasa drae kamko ka·enga ine matnangskaenba, VO-ni President aro Bookkeeper-ni kosako kragija bil jak mesoke jak de·aha.
“Batanggimin salrangrango VEC Secretary Jewilson Sangma bang·a hajirarangko gimaatoba, songni manderang chakchikachim, indiba changni chang Job Card-ni salko gimaatsimaia aro VO-ni Monitoring ka·aniko namnikjae pangnan sriksrik kamko ka·ronga” ine songni manderang parakataha.
Iandakgipa kamrangna songni manderang suk ong·jae, VEC Secretary Jewilson Sangma-ni kosako raka ja·kuko de·china dabie songni manderang Block Officer-na badi ka·doangaha.
