Raksamgre, June 29, 2025: Bilsi 46 ong·gipa Dedapara songni Pirot R.Marak aro bilsi 44 ong·gipa Rengegre songni Nennen Rangsa, uamangni jik-se ra·e nokdang dakani bilsi 17 mangsan baiaiaha. Uamango depante sakgittam gnangchim aro skanggipa depante bilsi 8-san ong·kuengachim. Uni gisepon, Nennen Rangsa an·tangko nomil dake taripretenba, setangko so·mal done, sakgipin me·apako mikchae segipako so·ote galaha.
Ia a·sel namen misilbegipa aro ong·na krapilgijani ong·aha, A·chik Ma·ambio darangba segipani private part-ko rim·prete so·ota, dongkuja, ian skanggipa ong·genkon, ine chanchitokenga. Da·o uamangni sakgittam dedrang ma·gri-pagri ong·e brangna nangaha. Nennen Rangsa-ni segipako chu·ongnikjae, segipani kosako segipa gitalna sel·ani a·sel, mahari dolgni kratcha·e, jaksi chikna nangaha aro dedrangni mikkangchi dal·gni chugniko cha·sotaha.
Nennen Rangsa-ni indake segipani kosako me·asa gipinko sel·aniara skanggipa ong·jaha, indiba chang snigiparang ong·pilaha. Indiba, segipa Pirot sagi jikgipani an·tangko so·mal donoba, dedrangna ka·sae, chakchikaha, indiba Nennen Rangsa nokdangni gimin aro dedrangni gimin chanchigija, uni mikchagipa, Reknan K.Sangma, adatang Lepson Rangsa, jonggipa Sengba Rangsa-ni dakchakachi segipako so·otaha ine sianggipa nokdangoni suk ong·gijaniko parakataha.
Nennen Rangsa segipako so·ote, uni mikchagipa Reknan baksa kusi ong·e, janggi tangna miksonganiara, da·alo uamangna a·gilsak andalaha. Nennen, Reknan-ko mikchaoba, ra·na dongna man·jawachim, maina Reknan Sangma-ba jikgipa dongachim. Da·ode Nennen-ni akoko napgiparang, Reknan-ni jik-dedrang, Lepson aro Sengba-ni jik-dedrangna dal·bea dukni ong·aha.
Da·ode, Nennen-ni akkoko napgipa sakgittam Reknan, Lepson aro Sengba sakgipinko ‘salgi nigitoe ku·chi studapara’, an·tangtangon ga·akdapaha, ine bang·a manderang Social Media gita matnangattokaha.
Nennen Rangsa abitang Sonam Raghuvanshi-ko ja·rike, segipako so·otaniara an·tangna dal·bea gimaani aro dukniko ra·baha ine bang·a manderang Social Media-rango janapattokaha aro sianggipa nokdangna kakket bichalko on·china didiattokaha.
