Tura, Nov 16,2024: North Eastern Hill University (NEHU)-ko kal·ake roenggipa NEHU-ni Vice Chancellor Prof. Prabha Shankar Shukla-ko kam watchina aro NEHU Administrative-ni Registrar aro Deputy Registrar-ko kam ra·galchina dabie, Shillong aro Tura Campus ge·gnion, NEHU-ni chatro chatrirang jingjengatanirangko dakengon, NEHU-o ong·enggipa obostarangko namatna gita NEHU-ni VC-ko kam watchina aro gital VC-ni jakchi campus ge·gnion joltangni Pro Vice Chancellor (PVC)-rangko songe on·china NEHU Tura Campus-ni chatro chatrirang dabie, Tura-ni MP Saleng A Sangma-na sedoataha.

“Da·o ong·enggipa NEHU-ni VC ong·e kamko jako ra·chengaonin NEHU-ni obostarang namen tang·onaha aro University-o uni kam choligijaniko mesokani ong·a. University-ni indake tang·onangani a·sel, NEHU-ni mingnamanirang nosto ong·aha aro lekka porako on·anio tang·one, chatro chatrirangna nangchakeaniko ra·baaha” ine NEHU Tura Campus-ni chatro chatrirang, Tura MP-na sedoatgipa chittio parakataha.

Kam ka·na changgijagipa manderangko Registrar aro Deputy Registrar-na kamo rakkiahani gimin VC-ko matnange, ua sakgni official-rangko ta·raken kamoniko ra·galchina dabiangenba, uamang University-ko chalaianio chu·sokgijanirangko nikna man·aha ine Tura campus-ni chatro chatrirang parakataha.

NEHU Tura campus-o dongpagipa garirangba namjaha, hostel-rangko name taridapjaha, chirang chu·ongja aro research dakenggipa chatro chatrirangna dingtang hostel-rangba dongja ine chatro chatrirang, Tura MP-na badi ka·doangaha.

“NEHU Tura campus-o Academic building-rangba be·na siengaha, skigiparangba chu·ongja, History aro Archaeology Department-o bosturang chu·ongja, Central Library-o ki·taprang chu·ongjani a·sel poraianirango neng·nikanirangko man·enga. Una agreba dingtang dingtang kamrangna Advertisement on·ani ja·mano non-teaching staff-rangko da·onan ra·chipkujaengani a·sel kam ka·anio neng·nikanirangko chagrongna nangenga” ine Tura campus-ni chatro chatrirang parakataha.

NEHU-ni VC Prof Shukla-ko kam watchina dabianio pilak chatro chatrirangan ku·cholsan ong·e, Shillong aro Tura campus ge·gnina PVC-rangko songe on·piltaichina chatro chatrirang, Tura-ni MP-ko didiataha.

NEHU Tura-ni campus-ni Post Graduate Students Union (PGSU)-ko VC-sa bon·ataha ine chatro chatrirang suk ong·gijaniko parakatenba, NEHU-o poraienggipa chatro chatrirangni dingtang dingtang neng·nikanirangko man·engmitting somoirango ku·rang on·dilna gita PGSU-ko songpiltaie on·china aro chatro chatrirangni namgnina ta·raken PGSU-ni election-ko ong·atchina gitaba, NEHU-ni chatro chatrirang Tura-ni MP-ko mol·molataha.