Tura, Nov 11, 2024:NEHU Tura Campus-o poraienggipa chatro chatrirangni dabianirangko knachakjaengani gimin, NEHU-ni Vice Chancellor (VC) Prabha Shankar Shukla-ni kosako jegale, November 11 tariko Garo Students’ Union (GSU) Central Executive Committee (CEC) Tura, NEHU-ni Student-rang aro Garoland State Movement Committee (GSMC) HQ, Tura apsan bakrime, NEHU Tura Campus-ni napram do·gachol (gate) mikkango sima ari dongija jingjengataniko a·bachenhataha.
Chatro chatrirangni dabianirangara NEHU Shillong aro Tura Campus-o kam ka·enggipa joltangni Pro Vice Chancellor (PVC)-ko ta·rake songchina, VC-ni niamgri appoint ka·gipa Campus Director, Sujata Gurudev-ko ta·rake kam ra·galchina, Post Graduate Students Union (PGSU) ba Student Union-ni eleksin-ko ta·rake ong·atchina, NEHU Tura Campus-o kam ka·giparangna ‘Equal Pay for Equal Work’-ko on·china, NEHU Tura Campus-o Joint Registrar aro Deputy Registrar-ko appoint ka·china, NEHU Tura Campus-o bang·a Department-rangko on·dapchina aro joltangni manderangna skanggipa cholko on·china dabiani ong·achim.
Iarangko GSU CEC, NEHU-ni chatro chatrirang aro GSMC ru·uta sal somoirangonin dabiengachim aro changni chang NEHU-ni VC-na lekka sedoatahachim, indiba da·alona kingking mingsakoba chu·sokatkujaengani gimin, VC-ni kosako jegale, NEHU Shillong aro Tura Campus-o jingjengataniko a·bachengataha.
GSU, NEHU-ni Student-rang aro GSMC-ni mingsa mongsonggipa dabianiara, NEHU-ni VC Prabha Shankar Shukla-ko ta·rake kam ra·galchina raken dabiangaha.
NEHU Tura Campus-o poraienggipa chatro chatrirangni dabianirangko chu·sokatkuja dipetna, jingjengataniko dontongjawa aro NEHU Tura Campus-ni do·gako kulijawa ine Chatro Chatrirang parakataha.
“Mai miksonganio PGSU ba Student Body-ko bon·ataha. NEHU Tura Campus-o Student Body dongjani a·sel, chatro chatrirangni nangnikanirangko ku·rang on·na man·jajok. Uni gimin, chingna Student Body-ko nangchongmota aro ta·rake Student Union-ni eleksin-ko NEHU Tura Campus-o ong·atna nanga. NEHU Tura Campus-ni Student Body-ko bon·ate, VC an·tangsa gimiko jako ra·enga. Chingna indakgipa VC-ko nangja, namgipa VC-kosa nanga. Ua (VC) NEHU-ni Pro Vice Chancellor-koba bon·ate, NEHU-o kam ka·gijagipa a·palni mandeko Campus Director appoint ka·ani a·sel, chinga namen neng·nikanirangko chagrongna nangenga” ine chatro chatrirang parakataha.
