Shillong, Nov 17, 2024: North Eastern Hill University (NEHU)-ni Vice Chancellor (VC) Prof. Prabha Shankar Shukla-ko kam watchina dabie, chatro chatrirang Shillong aro Tura Campus-o sima ari dongija jingjengataniko dakengon, a·dokni Education Minister Rakkam A Sangma changsatai ka·dongataniko on·ataha aro uamangni jingjengataniko dontongchina mol·molangaha.

“A·dokni Skotong Minister iani bidingo chanchina tik ka·aha aro Ministry-naba u·iatenba niam gita kamrangko ka·anggen ine parakataha. Anga ia mamlako ning·tuen ra·enga, maina ian ramramgipa katta ong·ja aro chinga uamang baksa chadenga” ine Rakkam Sangma aganaha.

University-ni Academic-rang aro chatro chatrirangni jingjengataniko dakanichi sakantian so·sojengjeng ong·enga. Indake ong·genchimoba, “Chinga uamang baksa ong·a aro sakantian gisiko nangenga. Da·o iani bidingo Ministry jako ra·anggen. Chinga ia mamlani gimin uamangko gronge jingjengataniko dontongchina mol·molgen”
ineba Sangma aganaha.

A·dokni Skotong Minister Conrad K Sangma Ministry baksa agangrikaniko dakenba, ia mamlani bidingo seataha. “Uni gimin, Ma·mong Ministry-ni aganchakaniko nichaksoenga aro uamangni jingjengataniko dontonge class-tangtangchi re·angpilchina” Education Minister chatro chatrirangko didiataha.

“Dontonggija jingjengataniko dakenggipa chatro chatrirangni an·seng baljokanina aro Academic-na chanchie, jingjengataniko dontongchina anga chatro chatrirangko mol·molatna sika” ine Sangma agandapataha.

NEHU Shillong aro Tura Campus-o name kam ka·jani gimin aro Administrative-ko chalaianio name chu·sokna man·jani a·sel chatro chatrirang namen neng·nikaniko man·enga ine matnangenba NEHU-ni VC-ko kam watchina jegaltokengani bidingo am·sandianiko dakna Committee-ko songe, Bristbar salo Ma·mongni Education Ministry-na u·iataha.

NEHU-ni mamlako sing·sandina sakgni Member Committee-ko songaha. Committee-ko University Grants Commission (UGC)-ni gitcham Chairman Prof. DP Singh Chairman aro Assam University-ni gitcham Vice-Chancellor Prof Dilip Chandra Nath member ong·e kam ka·anggen, ine parakataha.

NEHU-ni mamlako Committee, sal 15-ni gisepon report-rangko on·na man·gen ine ka·dongsoenga. Committee baksa chu·gimik bakrimaniko on·china aro am·sandianio dakchakpae, nangchongmotgipa lekkarangko on·china University-ni authority-rangko ge·etangaha.