Shillong, Nov. 21, 2024:Meghalaya High Court-ni ge·etaniko on·ahani gimin, North Eastern Hill University (NEHU)-ni chatro chatrirang, University Administrative-o ong·enggipa obostarangni bidingo jegale, NEHU Shillong Campus-o okgimu chakani aro Tura Campus-o jingjengatanirang namjabata obostarangona sokangengani gimin jingjengataniko dikdiksana dontongatchengaha.

Court Bench-ni Chief Justice IP Mukherji-ni dilachi, ru·uta salrangna okgimu chake jingjengatenggipa chatro chatrirangni an·seng baljokanina namen kenchakani ong·enga ine uamangna nama agan ku·pattianirangko on·china, State Authority-rangna Court ge·etaniko on·ataha. Court Bench-ni parakatani gitade, Ma·mong Sorkarini chanchie, NEHU-o ong·enggipa obostarangara maimancha ong·enga, uko sandichina sakgni member-ko Investigative Committee songe on·ataha aro ia Committee, chatro chatrirangni jegalanirangko bon·atna kamko ka·anggen.

Court-ni order on·atani gitade,
Medical Advice and Court-ni Recommendation-o pangchake, North-Eastern Hill University Students’ Union (NEHU-SU), Butbar salo uamangni sima ari dongija okgimu chake jingjengataniko dontongataha. Apsandaken NEHU Tura Campus-ni chatro chatrirangba jingjengataniko dontongatpaaha.

Okgimu chake jingjengatanio sakgittam chatro chatrirang baksa NEHU-SU-ni President Sandy Sohtun-ko man·chape, hospital-o admit ka·aha. NEHU Shillong aro Tura Campus-ni chatro chatrirang, re·anggipa November 6 tariko University-ko chipataha aro NEHU-ni Vice Chancellor Prof Prabha Shankar Shukla-ko kam watchina aro University-ni Registrar aro Deputy Registrar-ko kam ra·galchina dabie jingjengataniko a·bachengataha.

NEHU-ni chatro chatrirang okgimu chake jingjengataniko dontongatgenchimoba, asonge jingjengataniko pring 9 bajioni attam 5 bajiona dakangaikugen ine parakatengon, Education Ministry-ni songe on·gipa, Inquiry Committee, sal 2 ba sal 3-ni gisepon report-ko on·na man·gen ine ka·dongeaniko parakataha.

Uni gisepon, Ministry dabianirangko chu·sokatjaode aro University-ni dilgiparangko ra·galjagenchimode, jingjengataniko a·bachengatpiltaigen ine Sandy Sothun mikkrakataniko on·ataha.

Okgimu chake jingjengataniko dontongani ja·man, NEHU Student-ni dilgiparangko University-ni Administration baksa gital Vice Chancellor In-charge Prof N Saha, mittelpilangaha.