Shillong, Nov. 3, 2024: Re·anggipa Lok Sabha election-o Congress, Tura Parliamentary Seat-o altuen chena gita man·ahani gimin, November 13 tariko ong·atenggipa Gambegre by-election-oba apsandaken chena man·taigen ine Meghalaya Pradesh Congress Committee (MPCC)-ni President Vincent Pala ka·donganiko parakataha.
Gambegre by-election-ko sawa chegen, da·o dipet manderangni gisepo jijaanirang ong·engon, sorkariko chalaienggipa NPP pangnan dal·a dal·a kattako aganronga, indiba Congress, Lok Sabha election-o je dake cheaha, apsandaken Gambegre by-election-oba chetaigen ine Pala parakataha.
Tura Lok Sabha seat-o Congress candidate Saleng A Sangma, 3,83,919 vote-rangko man·e, 2,28,678 vote-rangko man·gipa NPP-ni candidate aro Tura-ni gitcham MP Agatha K Sangma-ko altuen chena gita man·aha.
Gambegre by-election-o chena gita Congress rakbate kamrangko ka·enga ineba Pala parakataha.
Garo Hills-o Congress bon·angengahani gimin Gambegre by-election-o ka·dongani dongjaha, ine NPP-ni dilgiparang aganahani gimin MPCC-ni President, ia kattarangna aganchakatskaha.
Pala-ni parakatani gitade Gambegre by-election-o Congress, TMC aro NPP-ni gisepo susagrikani ong·gen. Indake ong·genchimoba, Gambegre by-election-ni bidingo namedake aganna man·kuenga aro Gambegre-ona re·ange niosa, nambate ma·sina man·gen ine Pala parakataha.
Gambegre by-election-o Congress, Gambegre-ni gitcham MLA Saleng A Sangma-ni melibatgipa ripeng aro Congress member Jingjang M Marak-ko susaatenga.
Gambegre by-election-o NPP-ni National President aro Skotong Minister Conrad K Sangma-ni jikgipa Dr. Mehtab Chandee A Sangma susaengon, TMC-ni dilgipa Zenith Sangma-ni jikgipa aro Dengnakpara-ni MDC Sadhiarani M Sangma-ba susaenga. Uni gisepon, Tura-ni MDC aro BJP-ni State Vice President Bernard N Marak-ko susaengon, Independent candidate-rangba sakgni susaengachim.
