Tura, April 22, 2025:East Garo Hills (EGH) a·jani Mangsang jolo donggipa Morongga A·kingni ning·o ga·akgipa songrang Mogru, Nongkongkil aro Morongga songrangko Khasi Hills Autonomous District Council (KHADC)-ni km 10 batpile Garo Hills-ni a·ako a·kangdrae, pillar post ba krong songan baksa notice board-rangko tape ba songaniko A·chik State Peoples’ Front (ASPF) jegalatenba, Monggobar salo Garo HIlls Autonomous District Council (GHADC)-ni Chief Executive Member (CEM) Albinush R. Marak-ko gronge agangrikani somoio ta·rake sandiromaniko dakchina chittiko on·angaha.
ASPF-ni CEM-na sedoanggipa chittio janapatani gitade, Morongga A·kingo donggipa songrang jekai Nongkongkil aro Mogru songrang Garo Hills-ni biap man·chaan ong·achim. British-ni chasongo map wa·reng sale sualgipa document ba lekkarang aro sima ariko ma·sina songgimin rong·te ba pillar stone-rang sakkina da·onan dongkuenga. Ua jolo songdonggipa manderang Meghalaya a·dokko man·chengaonin MDC aro MLA election-rango an·tangtangni vote-rangko Garo Hills-on on·enga, jean Rongjeng GDC aro LAC-ni ning·o ga·akachim.
Songni manderangni talatani gitade, ua kajiako ra·bagipa darang gipin ong·ja, indiba Morongga songni Nokma-an ong·achim. Morongga Songni Nokma Ma Precy Nenglang, ua A·chik ong·jachim, indiba A·chik-ko segipa ra·e, ua Affidavit ka·enba an·tangko A·chik ine de·aha. Ua saksa GHADC-ni gitcham EM-ni dakchakachi an·tangko Nokma gatdrae ra·aha. Uni ma·chong chong·motde Nenglang ong·achim aro uni pagipako N.Lhangsa aro ma·gipako L.Nenglang mingachim. indide uko maikai Garo changen. Uko Affidavit ka·ani gimin Garo ine ra·chakna man·jawa aro uni ma·ambionin GHADC-o maming serikani dongja. Indiba Morongga A·kingko British-ni somoio map wa·reng sale on·gipaode, Nongbak Arengh-rangni A·king ine serikaniko nikna gita man·aha ine ASPF janapataha.
Ua A·chik ong·gija da·o A·kingni Nokma gatmanani ja·mano Khasi Hills-o chapna jotton ka·enga aro songni manderangna uni A·kingko High Court, Khasi Hills baksa chapchina order on·aha, ine Garo Hills-ni gitade dingtang dingtang kamrangna NOC on·aniko dontongataha. Uan kakket ong·jachim, indiba manderangko tol·e ma·srisretatna dakanisan ong·aia.
Uni gimin ua Nokma-ni
kosako namedake sandirokaniko dakenba rakgipa ja·kuko de·china ASPF, CEM-ko didiataha.
