Gasuapara, June 7, 2025: South Garo Hills a·jani Council of Nokma Gasuapara Circle-ni Nokma bol 20, South Garo Hills a·jaona ka·namgijagipa buringni mongmarang re·bae, manderangni janggiko kal·ake siatan baksa nok-jam, bagan barirang aro mal-gamrangko nosto ka·e galani a·sel songdonggipa manderangni janggina namen kenbeani ong·enga.

Uni gisepon a·dok sorkari aro wildlife department, manderangna naljokaniko on·na maming ja·ku de·anirangko dakjaengani gimin, Nokmarang June 7 tariko tom·e chanchirimaniko dakaha.

Nokmarangni talatani gitade, ia neng·nikani gimin dingtang dingtang NGO-rang aro songdonggipa manderang a·dok sorkarina u·iataniko on·genchimoba, maming kamrangko ka·a dongkujani gimin Nokmarang suk ong·gijaniko parakataha.

Sonibar salo Council of Nokma Gasuapara Circle, tom·e chanchirimaniko dakenba, minggittam dabianirangko a·dok sorkari aro wildlife department-na chitti seachi u·iatna tik ka·angaha.

Uamangni skanggipa dabianiara, Wildlife range-ko ta·rake Gasuapara jolo on·china. Gnigipa Angratuli forest reserve NH-62 soroko emergency wildlife guard-rangko watate songregipa aro songdonggipa manderangna naljokaniko on·china.
Gittamgipa songdonggipa manderangni aro Nokma Sanirangni mol·molaniko a·dok sorkari aro wildlife department knachakgija mikangchi manderangni janggiko buringni mongmarang nisie galataiode, a·dok sorkari aro wildlife department chu·gimik daitoko ra·na nanggen.

Unbaksana, songdonggipa manderang an·tangtangni janggina warachake, mongmarangna maiba a·selrang ong·genchimoba, a·dok sorkari aro wildlife department-an chu·gimik daitoko ra·na nanggen ine a·dok sorkari aro wildlife department-na seachi u·iatna tik ka·aha.

Nokmarangni A·king Gurini sepango donggipa forest reserve-rango buringni mongmarang jelbra jelsue dongengon, mandena aro mongmarangna cha·a ringani aro biap a·damrang dongangjahani gimin ia neng·nikanirangko a·dok sorkari ta·rake nirokenba kam ka·na nanga, maina a·gilsako janggi tangna gita mande aro matburing dolgnian right donga.

Uni gimin matburingrangko simsakgija donanichi bang·a changon, Gasuapara jolo bang·a manderang, mongmarangni kal·ake siatanirangko chagrongna gita nangenga ineba Nokmarang parakataha.