Baghmara, April 17, 2025: South Garo Hills a·jani Chokpot Constituency-o donggipa Mekalpagre songo donggipa LP Skul nok dongjani a·sel bi·sarangko babilsio class ra·enga, ine parakataha.
Koborna u·iatani gitade, ua Skulo poraienggipa bi·sarang sak 25-na baten dongachim, ua Skulo poraienggipa bi·sarang class room dongjae, skie ra·anio namen neng·nikaniko man·enga.
Ua LP skulo skigiparang aro poraienggipa chatro chatrirang class room dongjani a·sel namen neng·nikaniko chagrongna nangenga. Skigiparang class room dongjani a·sel, chonbegipa babilsio bilsi dokna baten skie on·aha. Ua chonbegipa babilsion, nursery-oni class five (v)-ona class-rangko ra·aha aro ua chonbegipa babilsion sak 25-na baten chatro chatrirang skie ra·enga aro Mekalpagre songo ia LP skul ge·sa mangmangsan dongaia ine Mekalpagre songni Secretary Willison T. Sangma parakataha.
Mekalpagre songo Skul nok aro class room dongjae, chonbegipa babilsio salanti skie ra·enggipa bi·sarang aro skigiparangni neng·nikanirangko nirokatpachina, Mekalpagre songni Secretary, bil gnanggipa South Garo Hills a·jani Officer-rangko mol·molataha.
