Shillong, June 19, 2025: Sohra jolo Raja Raghuvanshi-ko so·otanina rim·ako man·gipa Sonam Raghuvanshi-ni nokdangko sing·sandina gita Butbar salo Meghalaya a·dokni pulisrang, Indore songjinmaona re·angaha.
Meghalaya a·dokni pulisrang, Indore songjinmani Govind Nagar Karcha jolo donggipa Sonam ma·gipani nokona re·angaha, indiba pulisrang noko napani bakan, darangba nikjana gita nokni do·gacholko chipaha.
Sonam-ni nokdangko Meghalaya pulisrang, konta gnimangna sing·sandiaha. Pulisrang nokoni re·anga bakan Sonam-ni adagipa Govind-ba nokoni ong·katangaha ine u·iataha.
Ja·mano kobor ra·timgiparang baksa agangrikengon, Sonam-ni dakbewalrangkosan Meghalaya pulisrang, sing·sandiaiaha ine Govind aganaha.
Raja Raghuvanshi-ko so·otna skang Sonam, Sanjay Verma minggipa mande baksa pangnan phone-o golporongani bidingo sing·ahaon, iani giminde, ua mamingkoba ma·sija ine Sonam-ni adatang Govind aganchakaha.
Sanjay Verma-ra sawachim, maini gimin chang 119-na kingking ua Sonam-na call ka·aha, uamangni gisepo maibade dongna nanga ine pulisrang chanchichipenga aro pulisrang ua mandeko sandina nangenga. Sanjay Verma-ni phone da·ode swisch off ong·aha, ua mande bano dongenga da·odipet ma·sina man·kujaenga ine pulisrang aganaha.
Raja-ko so·otani bidingo kakketko ma·sina gita Sonam-ni nokdang gimikkon porikka ra·e nina nanga ine Raja Raghuvanshi-ni nokdang dabiangskaha.
Iani bidingo aganchakengon, ua an·tangde maming dos dongja, indiba saoba uni kosako saoba chanchichipanirang dongode, ua je dakgipa porikkakoba chagrongna man·aigen ine Govind aganaha.
Meghalaya pulisrang, Sahakar Nagar-o donggipa Raja Raghuvanshi-ni nokonaba re·ange, nokni manderangko sing·sandiaha.
Iani bidingo kobor ra·timgiparangna aganengon, “Meghalaya Pulisrang sakgittam, chingni nokona re·baaha aro minit 30 mangna chingko sing·sandiaha. Pulisrang Sonam-ni dakbewalrangni giminsan sing·sandiaiaha. Bia ka·ani ja·man, Sonam badita salrangna chingni noko dongaha, uko pulisrang sing·aha,” ine Raja-ni adatang Vipin Raghuvanshi aganaha.
Bia ka·daldale Sohra-ona re·baani ja·man, Raja Raghuvanshi-ko so·otanina, uni jikgipa Sonam aro uni mikchagipa Raj Kushwaha aro gipin sakgittam ripengranga Vishal Chauhan, Akash Rajput aro Anand Kurmi-ko pulisrang rim·aha.
