Shillong, June 11,2025: Raja Raghuvanshi-ko so·otanio mongsongbate dos dakgipa Sonam Raghuvanshi-ko Meghalaya Pulis Uttar Pradesh-oniko Shillong-ona rimbae, Monggolbar walo Shillong Ganesh Das Hospital-o be·en-ni gita porikka ra·e nion medical report-ni gitade ua oko kea dongja ine parakaha.

Meghalaya Pulis da·o sing·sandianiko dakangkuna gita Sonam-ko salgittamna pulisni jako donkuenga. Raja Raghuvanshi aro Sonam May 10 tariko Madhya Pradesh a·dokni Indore songjinmao bia ka·aha aro May 20 tariko honeymoon-na Mrleghalaya a·dokni Sorah-ona re·baaha.

Uamang jiksesani kusi ong·e roramna jumang niksoani chu·sokjaha aro May 23 tarikon uamang gimaaha ine koborko man·aha. Indake, June 2 tariko me·asa saksani sogimin manggisiko Cherapunji-ni WeiSawdong chidare sambao donggipa chubegipa a·silangoniko man·aha aro ja·mano uan Raja Raghuvanshi-ni manggisi ine ma·sina gita man·aha. Indiba uni gitoko gangipa sonani chain aro sonani jakstenkode uni manggisioniko man·jaha.

Raja Raghuvanshi-ko so·otani bidingo pulisrang sandianiko dakengon, apsan kam ka·pachina aro apsan ku·monge bakrimpachina Meghalaya Pulis sakantikon didiataha.