Tura, Sept 30, 2024: Meghalaya a·doko matchu den·ani aro cha·aniko champengna miksonge re·jomaniko ong·atna tik ka·enba, a·doko matchu cha·aniko champengna jotton ka·engani gimin Zikku Balgra N.Marak-ni dilenggipa Garo Students Union (GSU) CEC, Tura raken jegalataha.

A·doko songdongenggipa manderangni daka rikani aro cha·ani ringani bewalko champengna jotton ka·enga ong·ode, GSU nie dongjawa raken warachakaniko dakanggen ine parakataha.

“Chinga Garorang an·tangtangni daka rikaniko bilaken ja·rikgiparang ong·a aro a·paloni re·baenggipa dolrang chingko champengna aro chingni daka rikaniko dingtangatna on·jawa. A·doko songdongenggipa Tribal manderangni daka rikanirangko champengna jotton ka·genchimode chinga nie dongjawa,” ine GSU parakataha.

A·chikrangni daka rikanirango, matchu den·anide A·chikrangni mongsonggipa daka rikani bewal ong·a, “Hindu toromko man·chape chinga pilak toromrangko bebe ra·giparang ong·a, indiba toromni bimingo chingni cha·ani ringaniko champengna jotton ka·aniara jatsa jatgipin-ni torom ong·a. Torom gipinni gisepo so·sojengjeng ong·ataniko ra·baaigija Hindu-rangni gimin ong·gija dake mesokaniba ong·gen. A·songo tom·tome jatsa jatgipin baksa ku·mong nangrime songdongenggipa manderangko toromni bimingo kajia ka·na jotton ka·genchimode jrip nie dongjawa” ine GSU mikrakataniko on·ataha.