Shillong, Sept 30, 2024: Meghalaya a·doko nambate re·dilna man·na gita saksa bilakgipa aro ka·donggipa Skotong Minister-ko nangenga ine Voice of the People’s Party (VPP) parakataha.
“Meghalaya a·dokko dilenggipa Skotong Minister saksa bilgrigipa, an·tangko on·kanga grigipa aro daitotangko jako ra·na man·gijagipa ong·ani gimin a·dokni obostarang namjabatroroenga. Matchuko chel·chakna gita re·jomaniko dakna miksonggipa manderangna permission on·aniko ua Deputy Commissioner-na pakwate on·skaaha, ua saksa Skotong Minister ong·e, ka·pongni kamko mesokaha. Meghalaya a·dokko mikkango re·dilna kragipa aro bilakgipa Skotong Minister-kosa nangenga” ine VPP-ni ku·wattimgipa Batskhem Myrboh aganaha.
‘Gau Yatra’ ba matchurangko chel·chakna gita re·jomaniko ong·atna miksonggipani bidingo janapatengon, ian a·songo so·sojengjeng ong·aniko ra·bana jotton ka·enggipa manderangni a·song damsan, daka rikani mingsan, torom ge·san aro cha·ani ringanirangko apsan ong·atna miksonge dakdraanisa ong·enga ine Myrboh parakataha.
“Uamangni ja·ku de·aniara ra·bie dakanisa ong·enga aro iako jedakeba champengna nangchongmota. Ia kamo jak donggipa manderangko pattoko chipna nanga” ine VPP-ni ku·wattimgipa dabiangaha.
Matchu be·enara bang·bata Tribal manderangni mongsonggipa cha·ani ong·a. Ua manderangni re·jomaniko ong·atdrana jotton ka·aniara, Tribal-rangni daka rikaniko chonnikani gita ong·a. “India a·songni salgro salaram jolrango donggipa manderang, India a·songni gipin biaprango matchu be·enko cha·china didie jinma re·jomaniko ong·atskagenchimode, mai ong·skagen ine Myrboh sing·doataha.
A·songo songdongenggipa dingtang dingtang jatrang saksa sakgipinko mande ra·grikgenchimode bilakgipa a·song ong·na man·genchim ineba Myrboh parakataha.
